சென்னை எம்.ஜி.ஆர். நகரை அடுத்த ஜாபர்கான்பேட்டை பகுதியில், தன்னைப் பிரிந்து சென்ற முன்னாள் காதலி பணிபுரியும் காஃபி கடைக்குச் சென்று கல்லூரி மாணவன், ரகளையில் ஈடுபட்டு, அந்தச் சிறுமியைத் தாக்கிய சம்பவம் பரபரப்பை ஏற்படுத்தியுள்ளது. இந்தச் சம்பவம் தொடர்பாகச் சிறுமியின் பெற்றோர் அளித்த புகாரின் பேரில், காவல்துறையினர் அந்த மாணவனை கைது செய்து விசாரித்து வருகின்றனர்.
ஜாபர்கான்பேட்டையைச் சேர்ந்த 17 வயதுச் சிறுமி ஒருவர், கே.கே. நகரில் உள்ள காஃபி கடை ஒன்றில் வேலை பார்த்து வருகிறார். அவர், தங்கள் வீட்டின் அருகே வசிக்கும் கல்லூரி மாணவர் ஒருவரை காதலித்து வந்த நிலையில், சில மாதங்களுக்கு முன்பு இருவருக்கும் இடையே கருத்து வேறுபாடு ஏற்பட்டதால் இருவரும் பிரிந்துவிட்டனர்.
ஆனால், காதலை மறக்க முடியாமல் தவித்த மாணவன், கடந்த சில நாட்களாக சிறுமி வேலைக்குச் செல்லும் வழியில் அவரைத் தொடர்ந்து வழிமறித்துத் தொல்லை கொடுத்து வந்துள்ளார். “நீ மீண்டும் என்னைக் காதலிக்க வேண்டும்” என்று வற்புறுத்தி வந்துள்ளார். ஆனால், அவருடன் பேச மறுத்த சிறுமி, விலகியே சென்றுள்ளார்.
சிறுமி தொடர்ந்து தன்னை ஒதுக்கிச் செல்வதால் ஆத்திரமடைந்த அந்தக் கல்லூரி மாணவன், சிறுமி வேலை பார்த்து வரும் காஃபி கடைக்கே சென்று ரகளையில் ஈடுபட்டுள்ளார். இதைக் கடை உரிமையாளர்களும், அங்கிருந்தவர்களும் கண்டித்தனர். இதனால் ஆத்திரம் மேலும் அதிகரிக்கவே, அவர் அந்தச் சிறுமியை சரமாரியாக அடித்து உதைத்துள்ளார். இதனால் அங்கு பெரும் பரபரப்பு ஏற்பட்டது.
இந்தச் சம்பவம் குறித்து அறிந்த சிறுமியின் தாய், தனது மகளை தாக்கிய கல்லூரி மாணவன் மீது உரிய சட்ட நடவடிக்கை எடுக்க கோரி வடபழனி அனைத்து மகளிர் காவல் நிலையத்தில் புகார் அளித்தார். இதையடுத்து, வழக்குப் பதிவு செய்த காவல்துறையினர் உடனடியாக அந்த கல்லூரி மாணவனை கைது செய்து விசாரித்து வருகின்றனர்.
Read More : உங்கள் லேப்டாப் அடிக்கடி ஹீட் ஆகுதா..? வெடிக்கும் அபாயம்..!! உடனே இதை பண்ணுங்க..!!
