சேலம் மாவட்டம் கல்வராயன் மலை அடிவாரத்தில் உள்ள கருமந்துறைப் பகுதியில் நிலத்தகராறு காரணமாக திமுக கிளை செயலாளர் நாட்டு துப்பாக்கியால் சுட்டுக் கொல்லப்பட்ட சம்பவம் பெரும் பதற்றத்தையும் ஏற்படுத்தியுள்ளது.
கருமந்துறை அருகேயுள்ள கரிய கோவில், கிரான்காடு பகுதியைச் சேர்ந்தவர் ராஜேந்திரன் (45). விவசாயியான இவர், கிரான்காடு பகுதி திமுக கிளை செயலாளராகவும் இருந்து வந்தார். இவருக்கும் இவருடைய உறவினர்களான ராஜமாணிக்கம் மற்றும் பழனிசாமி ஆகியோருக்கும் இடையே நீண்ட நாட்களாக நிலம் சம்பந்தமான பிரச்சனை இருந்து வந்துள்ளது. இந்த தகராறு அடிக்கடி சண்டையாக மாறி, அக்கம் பக்கத்தினர் தலையிட்டு சமாதானம் செய்து வைப்பது வாடிக்கையாக இருந்துள்ளது.
இந்நிலையில், நேற்று நள்ளிரவு நேரத்தில் ராஜேந்திரன் தனது வீட்டின் அருகே உறங்கிக் கொண்டிருந்தார். அப்போது, மர்ம நபர்கள் ராஜேந்திரனை நாட்டு துப்பாக்கியால் சுட்டுவிட்டுச் சம்பவ இடத்தில் இருந்து தப்பிச் சென்றுள்ளனர். துப்பாக்கிச் சூட்டில் பலத்த காயமடைந்த ராஜேந்திரன் அங்கேயே உயிரிழந்தார்.
இந்த சம்பவம் குறித்துத் தகவல் அறிந்த வாழப்பாடி டிஎஸ்பி சுரேஷ்குமார் தலைமையிலான போலீசார் உடனடியாக சம்பவ இடத்திற்கு விரைந்து வந்தனர். உயிரிழந்த ராஜேந்திரனின் உடலை கைப்பற்றிய போலீசார், உடற்கூராய்வுக்காக சேலம் அரசு தலைமை மருத்துவமனைக்கு அனுப்பி வைத்தனர்.
இந்த கொலை தொடர்பாக, ராஜேந்திரனின் உறவினர்களான ராஜமாணிக்கம் மற்றும் பழனிசாமி ஆகிய இருவரையும் போலீசார் பிடித்து தீவிர விசாரணை நடத்தி வருகின்றனர். நிலத்தகராறு காரணமாகவே இந்த கொலைச் சம்பவம் நடந்திருக்கலாம் என்று முதற்கட்ட விசாரணையில் தெரியவந்துள்ளது.
மேலும், இந்த கொலை சம்பவத்தில் வேறு யாருக்கேனும் தொடர்பு உள்ளதா என்பதை அறியவும், குற்றவாளிகளை விரைந்து பிடிக்கவும் வாழப்பாடி டிஎஸ்பி உத்தரவின் பேரில் 3 தனிப்படைகள் அமைக்கப்பட்டுள்ளன. திமுக பிரமுகர் ஒருவர் நாட்டு துப்பாக்கியால் சுட்டுக் கொல்லப்பட்ட இந்த சம்பவம் பெரும் அதிர்ச்சியை ஏற்படுத்தியுள்ளது.
