திருமண நிச்சயதார்த்தம் நடந்த இளம்பெண் ஒருவர், தனது முன்னாள் காதலனிடம் இருந்து தப்பிக்க, அவரது நாக்கைக் கடித்துத் துப்பிய சம்பவம் அதிர்ச்சியை ஏற்படுத்தியுள்ளது.
உத்தரப்பிரதேச மாநிலம் கான்பூரைச் சேர்ந்த சாம்பி (35) என்பவர் திருமணம் ஆனவர். இவருக்கும் அப்பகுதியைச் சேர்ந்த இளம்பெண் ஒருவருக்கும் முதலில் பழக்கம் ஏற்பட்டுள்ளது. இருவரும் செல்போன் எண்களைப் பரிமாறிக் கொண்டு தொடர்ந்து பேசியதில், அது சாம்பிக்கு காதலாக மாறியுள்ளது. செல்போனில் பேசி இருவரும் காதலை வளர்த்து வந்ததாக கூறப்படுகிறது.
இந்தச் சூழலில், அந்த இளம்பெண்ணுக்கு அவருடைய பெற்றோர் திருமணம் செய்து வைக்க முடிவு செய்து, திருமண நிச்சயதார்த்தமும் நடந்து முடிந்தது. இதனை சாம்பியால் ஏற்றுக் கொள்ள முடியவில்லை. திருமணத்தை நிறுத்தும்படி அவர் இளம்பெண்ணிடம் வற்புறுத்தியுள்ளார். ஆனால், இளம்பெண் அதற்கு மறுத்து, சாம்பியுடனான தொடர்பை துண்டித்து விலகிச் சென்றார். இதனால், காதலன் சாம்பி கடும் மன உளைச்சலுக்கு ஆளானார்.
இந்நிலையில், சம்பவத்தன்று அந்த இளம்பெண், தனது வீட்டிற்கு அருகில் உள்ள ஒரு குளத்திற்கு தனியாக சென்று கொண்டிருந்தார். இதைப் பார்த்த காதலன் சாம்பி, அவரைப் பின்தொடர்ந்து சென்றுள்ளார். அப்பகுதியில் யாரும் இல்லை என்பதை உறுதி செய்துகொண்ட சாம்பி, திடீரென இளம்பெண்ணை கட்டியணைத்துள்ளார்.
இதனால் அதிர்ச்சி அடைந்த இளம்பெண், தன்னை விடும்படி கெஞ்சினார். ஆனால் சாம்பி கேட்காமல், அவரைப் பாலியல் வன்கொடுமை செய்ய முயன்றதாக கூறப்படுகிறது. பின்னர், சாம்பியின் பிடியில் இருந்து தன்னால் விடுபட முடியவில்லை என்பதை உணர்ந்த இளம்பெண், ஆத்திரத்தில் அவர் முத்தம் கொடுக்க முயன்றபோது, சாம்பியின் நாக்கைப் பலமாக கடித்துத் துப்பினார்.
இதனால், ரத்தம் கொட்டியதால் நிலை குலைந்த அவர், இளம்பெண்ணை விட்டு விலகினார். இந்தச் சந்தர்ப்பத்தைப் பயன்படுத்திய இளம்பெண் அங்கிருந்து தப்பியோடிவிட்டார். இதனைத் தொடர்ந்து, நாக்கில் பலத்த காயம் அடைந்த சாம்பி, உடனடியாக சமுதாய நலவாழ்வு மையத்தில் அனுமதிக்கப்பட்டார். அங்கு முதலுதவி சிகிச்சை அளிக்கப்பட்ட பிறகு, அவர் மேல் சிகிச்சைக்காகக் கான்பூரில் உள்ள மருத்துவமனைக்கு மாற்றப்பட்டார். தற்போது அங்கு அவருக்குச் சிகிச்சை அளிக்கப்பட்டு வருகிறது.
இதுகுறித்து கான்பூர் துணை ஆணையர் தினேஷ் திரிபாதி, “சம்பவம் தொடர்பாகச் சாம்பி மீது வழக்குப்பதிவு செய்யப்பட்டுள்ளது. விசாரணைக்குப் பிறகு, குற்றச்சாட்டுகளுக்கு உள்ளானவர் மீது உரிய நடவடிக்கை எடுக்கப்படும்” என்று தெரிவித்துள்ளார்.
