சேலம் மத்திய சிறையில் கைதிகளுக்குச் சிறப்புக் காவலர் ஒருவரே செல்போன்கள், கஞ்சா மற்றும் பிற போதைப் பொருட்களைச் சட்டவிரோதமாகக் கடத்த முயன்ற சம்பவம் பெரும் அதிர்ச்சியை ஏற்படுத்தியுள்ளது. சிறைத்துறை அதிகாரிகளின் தீவிர ரகசியக் கண்காணிப்பு காரணமாக இந்தக் குற்றச் செயல் முறியடிக்கப்பட்டுள்ளதுடன், சம்பந்தப்பட்ட காவலர் பணியிடை நீக்கம் செய்யப்பட்டு, கைது செய்யப்பட்டுள்ளார்.
கடந்த சில மாதங்களாகவே, சேலம் மத்திய சிறைக்குள் காவலர்கள் மூலமாகச் செல்போன்கள் மற்றும் போதைப்பொருட்கள் வழங்கப்படுவதாகக் குற்றச்சாட்டுகள் எழுந்து வந்தன. இதனைத் தொடர்ந்து, சிறைத்துறை அதிகாரிகள் கைதிகளிடம் விசாரணை நடத்தி, ரகசியக் கண்காணிப்புப் பணியில் ஈடுபட்டு வந்தனர்.
இந்தச் சூழலில், இரண்டாம் நிலைச் சிறைக் காவலராகப் பணியாற்றி வந்த செல்வராசு என்பவர் நேற்று தனது வீட்டிலிருந்து 3 செல்போன்கள், சிம் கார்டுகள், கஞ்சா, போதை மாத்திரைகள், போதை தாள் மற்றும் ஹான்ஸ் போன்ற போதைப் பொருட்கள் அடங்கிய இரண்டு பொட்டலங்களைத் தயார் செய்து எடுத்து வந்ததாக தகவல் கிடைத்தது.
செல்வராசு சட்டவிரோதமாகப் பொருட்களைக் கடத்த முயற்சிப்பது குறித்து ரகசியத் தகவல் முன்கூட்டியே கிடைத்ததால், சிறை அதிகாரி இரு வேறு இடங்களில் சிறைக் காவலர்களைக் கண்காணிப்புப் பணியில் ஈடுபடுத்தினார். பணிக்கு வந்த காவலர் செல்வராசு, சரியான சந்தர்ப்பம் பார்த்து, சிறையில் உள்ள கைதிகளுக்கு இந்தப் பொட்டலங்களை வழங்கத் திட்டமிட்டிருந்தார்.
எனினும், அங்கு உஷாராக காத்திருந்த காவலர்கள் அவரைச் சுற்றி வளைத்தனர். உணவு அருந்தச் செல்வது போல் வெளியே சென்ற செல்வராசு, கருப்பு டேப் சுற்றப்பட்டிருந்த இரண்டு பொட்டலங்கள் அடங்கிய பையைப் பயன்படுத்தி, அந்தப் பொருட்களை உள்ளே கொடுக்காமல், மீண்டும் வெளியே எடுத்துச் செல்ல முயன்றபோது, அவர் பிடிபட்டார். அப்போது அந்தப் பொட்டலங்களைப் பரிசோதித்துப் பார்த்தபோது, அதனுள் செல்போன்கள் மற்றும் போதைப் பொருட்கள் இருந்தது கண்டுபிடிக்கப்பட்டது.
இந்தச் சம்பவம் தொடர்பாக உடனடியாக அஸ்தம்பட்டி காவல் நிலையத்தில் புகார் அளிக்கப்பட்டது. புகாரின் அடிப்படையில், காவல்துறையினர் இரண்டாம் நிலைச் சிறைக் காவலர் செல்வராசுவை உடனடியாகக் கைது செய்து அழைத்துச் சென்றனர். மேலும், இந்தச் சட்டவிரோதச் செயலில் ஈடுபட்டதன்பேரில், செல்வராசு உடனடியாகப் பணியிடை நீக்கம் செய்யப்பட்டார். சிறைக் காவலரே போதைப் பொருட்கள் மற்றும் செல்போன்களை வழங்க முயன்ற சம்பவம், சேலம் மத்திய சிறை வட்டாரத்தில் பெரும் பரபரப்பை ஏற்படுத்தியுள்ளது.
