தமிழ்நாட்டில் சொந்தப் பயன்பாட்டிற்காக வாங்கப்படும் புதிய இருசக்கர மற்றும் 4 சக்கர வாகனங்களைப் பதிவு செய்ய இனி வட்டாரப் போக்குவரத்து அலுவலகங்களுக்கு (RTO) நேரில் கொண்டு வர வேண்டியதில்லை என்று அறிவிக்கப்பட்டுள்ளது. சென்னை உயர் நீதிமன்றத்தின் உத்தரவைப் பின்பற்றி, போக்குவரத்து ஆணையர் கஜலட்சுமி இந்தக் கூடுதல் நடைமுறை விலக்கை அனைத்து ஆர்.டி.ஓ. மற்றும் யூனிட் அலுவலகங்களுக்கும் பிறப்பித்துள்ளார். இந்த புதிய விதிமுறை டிசம்பர் 1ஆம் தேதி முதல் அமலுக்கு வருகிறது.
இதுவரை, பொதுமக்கள் புதிதாக வாங்கும் வாகனங்களை ஆய்வு செய்வதற்காக டீலர்கள் மூலமாக ஆர்.டி.ஓ. அலுவலகங்களுக்கு அனுப்ப வேண்டிய கட்டாயம் இருந்தது. இந்த நடைமுறையால், பொதுமக்களுக்கு நீண்ட நேரம் காத்திருக்க வேண்டிய சூழலும், தேவையற்ற கூடுதல் கட்டணங்களைச் செலுத்த வேண்டிய நிலையும் நீடித்தது. தமிழ்நாட்டில் தினமும் சுமார் 3,000 முதல் 4,000 வரையிலான சொந்த உபயோக வாகனங்கள் பதிவு செய்யப்படும் நிலையில், இதனால் ஏற்படும் தாமதம் மற்றும் செலவுகள் குறித்துப் பொதுமக்கள் தொடர்ந்து புகார் அளித்து வந்தனர்.
மத்திய அரசு மோட்டார் வாகனச் சட்டத்தில் திருத்தம் கொண்டு வந்தபோது, சொந்தப் பயன்பாட்டிற்கான வாகனங்களைப் பதிவு செய்யும்போது அவற்றை நேரில் கொண்டு வர வேண்டியதில்லை என்று விதிவிலக்கு அளித்தது. ஆனால், இந்த விதிமுறை தமிழ்நாட்டில் அமல்படுத்தப்படாமல் இருந்தது. இதையடுத்து, ஆட்டோமொபைல் டீலர்கள் சங்கம் தொடர்ந்த வழக்கில், இந்த விலக்கை அமல்படுத்துமாறு உயர் நீதிமன்றம் உத்தரவிட்டது. இந்தத் தீர்ப்புக்கு எதிராக மாநில அரசு உச்ச நீதிமன்றத்தில் தாக்கல் செய்த மேல்முறையீட்டு மனுவும் தள்ளுபடி செய்யப்பட்டது.
புதிய நடைமுறை என்ன..?
உயர் நீதிமன்றத்தின் இந்தத் தெளிவான உத்தரவைத் தொடர்ந்து, நவம்பர் 19ஆம் தேதி வெளியிடப்பட்ட சுற்றறிக்கையில், முழுமையாகக் கட்டமைக்கப்பட்ட சொந்த வாகனங்களைப் பதிவு செய்யும்போது, அவற்றை நேரில் ஆய்வு செய்ய வற்புறுத்தக் கூடாது எனப் போக்குவரத்து ஆணையர் கஜலட்சுமி அனைத்து ஆர்.டி.ஓ.க்களுக்கும் அறிவுறுத்தியுள்ளார்.
டிசம்பர் 1 முதல், அங்கீகரிக்கப்பட்ட டீலர்களே ஆவணங்களின் அடிப்படையில் பதிவு நடைமுறைகளை முழுமையாக முடித்துவிடலாம். சொந்தப் பயன்பாட்டிற்கான வாகனங்களில் சுமார் 80% இருசக்கர வாகனங்களாகும். இவை அனைத்தும் இனி இந்த புதிய நடைமுறையின் கீழ் வரும்.
வணிகப் பயன்பாட்டிற்கான வாகனங்களை மட்டும் பதிவு செய்ய, தொடர்ந்து ஆர்.டி.ஓ. அலுவலகத்திற்குக் கொண்டு வந்து கட்டாய ஆய்வுக்கு உட்படுத்த வேண்டும் என்றும் அதிகாரிகள் தெளிவுபடுத்தியுள்ளனர்.
சிறப்புத் தொழில்நுட்பக் குழுவின் அறிக்கையின் அடிப்படையில், மத்திய சாலைப் போக்குவரத்து மற்றும் நெடுஞ்சாலைத் துறை அமைச்சகத்தை அணுகியுள்ள மாநில அரசு, ‘வாகன்’ (VAHAN) இணையதளத்தில் முழுமையாகக் கட்டமைக்கப்பட்ட வாகனங்களுக்கான பதிவு முறையை நிரந்தரமாகச் செயல்படுத்தக் கோரியுள்ளது. அதுவரை, தற்காலிக நடைமுறைகள் பின்பற்றப்படும் என்றும் தெரிவிக்கப்பட்டுள்ளது.
Read More : விவசாயிகளே.. இன்று தான் கடைசி..!! பயிர் காப்பீட்டுக்கு உடனே பதிவு பண்ணுங்க..!!
