சமைத்த உணவுகள், குறிப்பாக காய்கறிக் குழம்புகள் அல்லது பொரியல்களை ஃபிரிட்ஜில் வைத்து, தேவைப்படும்போது மீண்டும் சூடுபடுத்திச் சாப்பிடும் பழக்கம் பலரிடமும் உள்ளது. இது உணவை வீணாக்காமல் தவிர்க்க உதவும் என்றாலும், ஒரு சில காய்கறிகளை மீண்டும் சூடாக்குவது நம் ஆரோக்கியத்திற்குப் பெரும் தீங்கு விளைவிக்கும். ஏனெனில், சில காய்கறிகளில் உள்ள நைட்ரேட் சத்துகள், மீண்டும் சூடுபடுத்தும்போது தீங்கு விளைவிக்கும் நைட்ரோசமைன்களாக (Nitrosamines) மாறுகின்றன. எந்தெந்த உணவுகளை மீண்டும் சூடுபடுத்தக் கூடாது? அது ஏன் என்று இங்கு விரிவாகப் பார்க்கலாம்.
கீரை : கீரையில் அதிக அளவில் நைட்ரேட்டுகள் உள்ளன. இவற்றை மீண்டும் சூடுபடுத்தும்போது, இந்த நைட்ரேட்டுகளின் அளவு அதிகரித்து, இது இரத்தத்தின் ஆக்ஸிஜன் அளவைக் குறைக்கலாம். இது குழந்தைகளுக்கு நீல-தோல் நோய்க்குறியை (Blue-skin syndrome) ஏற்படுத்தலாம். பெரியவர்களுக்கு, தலைச்சுற்றல், வாந்தி மற்றும் வயிற்று வலி போன்றவற்றை ஏற்படுத்தும்.
மேலும், கீரையில் இரும்புச்சத்து அதிகமாக உள்ளது. இரும்பைத் தேவைக்கு அதிகமாகச் சூடாக்கும்போது, அது ஆக்ஸிஜனேற்றம் (Oxidation) அடையத் தொடங்குகிறது. இவ்வாறு இரும்பு ஆக்ஸிஜனேற்றம் அடையும்போது, அதிக அளவில் ஃப்ரீ ரேடிக்கல்கள் உருவாகின்றன. இந்த ஃப்ரீ ரேடிக்கல்கள் உடலில் உறிஞ்சப்படும்போது, புற்றுநோய் மற்றும் கருவுறாமை (Infertility) போன்ற உயிருக்கு ஆபத்தான பல நோய்களின் அபாயத்தை அதிகரிக்கக்கூடும்.
உருளைக்கிழங்கு : உருளைக்கிழங்கை சமைத்த பிறகு மீண்டும் சூடுபடுத்துவதைத் தவிர்க்க வேண்டும். உருளைக்கிழங்கை மீண்டும் சூடாக்குவது போட்யூலிசம் (Botulism) பாக்டீரியாவின் அபாயத்தை அதிகரிக்கிறது. மேலும், உருளைக்கிழங்கில் உள்ள ஸ்டார்ச் சத்து, மீண்டும் சூடுபடுத்தும்போது உடைந்து, தீங்கு விளைவிக்கும் புதிய சேர்மங்களை உருவாக்குகிறது. எனவே, வேகவைத்த உருளைக்கிழங்கு அல்லது உருளைக்கிழங்கு சார்ந்த குழம்புகளை மீண்டும் சூடாக்குவது பாதுகாப்பற்றது என்று கருதப்படுகிறது.
காளான் : காளான்களில் அதிக அளவு புரதச்சத்து உள்ளது. இந்த உயர்தரப் புரதம் மீண்டும் சூடுபடுத்தப்படும்போது அதன் தன்மையை மாற்றுகிறது. இந்த மாற்றம் வயிற்றுக் கோளாறு, வாயுத்தொல்லை, வாந்தி மற்றும் வயிற்றுப்போக்கு போன்ற செரிமானப் பிரச்சினைகளை ஏற்படுத்தலாம். எனவே, காளான் உணவுகளைத் தயாரித்த உடனேயே உட்கொள்வது மிகவும் நல்லது.
சாதம் (அரிசி) : வேகவைத்த சாதத்தில் பேசிலஸ் செரியஸ் (Bacillus Cereus) என்ற ஒரு வகை பாக்டீரியா மிக வேகமாகப் பெருகும். இந்தக் கிருமிகள் ஃபிரிட்ஜில் வைத்தாலும் இறக்காது. இதைச் சாப்பிட்டால் கடுமையான வாந்தி மற்றும் வயிற்றுப்போக்கு ஏற்படும் அபாயம் உள்ளது. அதனால், சாதத்தை முறையாகச் சேமித்து, கூடிய விரைவில் சாப்பிட்டு முடிப்பது மிகவும் அவசியம்.
நிலத்தடியில் விளையும் காய்கறிகள் : கேரட், பீட்ரூட் போன்ற நிலத்தடியில் வளரும் காய்கறிகள் குறிப்பிடத்தக்க அளவு நைட்ரேட்டுகளைக் கொண்டுள்ளன. இந்தக் காய்கறிகளை மீண்டும் சூடுபடுத்தும்போது, நைட்ரேட்டின் அளவு கணிசமாக அதிகரிக்கிறது. இவ்வாறு இரண்டாவது முறை சூடுபடுத்தும்போது உருவாகும் நைட்ரேட்டுகள் நச்சுத்தன்மையுடையதாக மாறி, உடலுக்குக் கடுமையான தீங்கு விளைவிக்கும். மேலும், சில ஆய்வுகளின்படி, இந்தக் காய்கறிகளை மீண்டும் சூடாக்குவது புற்றுநோயை உண்டாக்கும் பண்புகளையும் வெளியிடக்கூடும். எனவே இவற்றையும் தவிர்ப்பது ஆரோக்கியத்திற்கு உகந்தது.
பொறுப்புத் துறப்பு : மேற்கண்ட விவரங்கள் அனைத்தும் சமூக வலைதளங்களில் வரும் மருத்துவ நிபுணர்களின் தனிப்பட்ட கருத்துக்களாகும். இவற்றின் உண்மைத் தன்மையை Tamil Xpress இணையதளம் உறுதிப்படுத்தவில்லை.
Read More : காளான் முதல் கடல் உணவு வரை..!! மழைக்காலத்தில் கட்டாயம் தவிர்க்க வேண்டிய உணவுகள் எவை..?
