இந்தியாவில் 7,000-க்கும் மேற்பட்ட ரயில் நிலையங்களில் தினமும் 2.5 கோடிக்கும் அதிகமான மக்கள் பயணம் செய்கின்றனர். பயணிகளின் அத்தியாவசிய தேவைகளுக்காக பல வகையான உணவு, தண்ணீர், புத்தகம், சிற்றுண்டி கடைகள் அமைந்திருந்தாலும், ஆச்சரியப்படும் விதமாக இங்கு மருந்துக் கடைகள் (மெடிக்கல் ஷாப்) இருப்பதில்லை. பல லட்சம் மக்கள் வந்து செல்லும் இந்த மையங்களில், ஒரு மருந்தகம் இல்லாததற்கான காரணங்கள் என்ன, அதனால் ஏற்படும் சிரமங்கள் என்ன, அதை தீர்க்க அரசு எடுத்துள்ள நடவடிக்கை என்ன என்பது குறித்து இங்கே பார்க்கலாம்.
ரயில் நிலையங்களில் கடைகள் :
இந்திய ரயில்வே (IRCTC) நேரடியாக நாட்டில் சுமார் 14 லட்சம் பேருக்கு வேலைவாய்ப்பை வழங்குவதுடன், மறைமுகமாக பலருக்கு தொழில் வாய்ப்புகளையும் வழங்குகிறது. ரயில் நிலையங்களில் கடைகளை அமைக்க, ரயில்வேயின் சம்பந்தப்பட்ட பிரிவிடமிருந்து உரிமம் பெற வேண்டும். டீ-ஸ்நாக்ஸ் கடைகளுக்கு பயணிகள் அதிக அளவில் வருவதால், இவை பெரும் வருவாய் ஈட்டும் துறையாக இருக்கின்றன. ஆனால், மருந்துக் கடைகள் மட்டும் அமைப்பதில்லை என்பதற்குப் பின்னால் பல நடைமுறை சவால்கள் உள்ளன.
மருந்துக் கடைகள் ஏன் இல்லை..?
ரயில் நிலையங்களில் மருந்துக் கடைகள் அமைப்பதில் பல சவால்கள் உள்ளதாக கூறப்படுகிறது. இதற்கு 3 முக்கிய காரணங்களும் உள்ளன.
கடுமையான விதிகள் மற்றும் பாதுகாப்பு சவால்கள் : மருந்துக் கடை வைப்பதற்குப் பல கடுமையான விதிமுறைகளைப் பின்பற்ற வேண்டியது அவசியம். குறிப்பாக, சில முக்கியமான மருந்துகளை சரியான வெப்பநிலையில் பாதுகாப்பாகப் பராமரித்து, கையாளுவது கட்டாயம். ஆயிரக்கணக்கானோர் வந்து செல்லும் ஒரு பிஸியான ரயில் நிலைய சூழலில், மருந்துகளை வெளியே உள்ள கடையிலிருந்து ரயில் நிலையத்தின் உள்ளே கொண்டு வந்து, சரியான வெப்பநிலையில் பராமரிப்பது மிகவும் சவாலான பணியாகக் கருதப்படுகிறது.
அதிக முதலீடு : மருந்துக் கடைகளில் ஓட்டல்கள் அல்லது பிற கடைகளில் நடக்கும் அளவுக்கு வியாபாரம் நடப்பது இல்லை. வியாபாரம் குறைவாக இருக்கும்போது, லாபமும் குறைவாகவே இருக்கும். ஆனால், மருந்துக் கடையில் 24 மணி நேரமும் சேவை வழங்க, டி-ஃபார்ம் அல்லது பி-ஃபார்ம் படித்த தகுதியான மருந்தாளுநர்களை (Pharmacists) 3 ஷிஃப்டுகளுக்கும் வேலைக்கு அமர்த்தி அவர்களுக்குச் சம்பளம் கொடுக்க அதிக முதலீடு தேவைப்படும். இவ்வளவு செலவு செய்து முதலீடு போடும்போது, அதற்கேற்ற லாபம் கிடைக்காது என்பதால், பலர் ரயில் நிலையங்களில் மருந்தகம் அமைக்க முன்வருவதில்லை.
அவசரமும் பிழைகளும் : ரயில் பிடிப்பதற்காக அவசரமாக ஓடி வரும் மக்கள், மருந்துச் சீட்டை கொண்டு வந்து நிதானமாக மருந்துகள் வாங்கிக்கொண்டு இருப்பார்கள் என்று சொல்ல முடியாது. அதேபோல, கடைக்காரரும் அதே அவசரத்துடன் மருந்துச் சீட்டைச் சரிபார்த்துக் கொடுக்கும்போது, மருந்துகளில் தவறு நடப்பதற்கு அதிக வாய்ப்புகள் உள்ளன. மனித உயிரைப் பாதிக்கும் மருந்து விநியோகத்தில் பிழைகள் ஏற்படாமல் தடுப்பதும் ஒரு காரணமாகும்.
அவசரகால தீர்வுகள் :
அவசர மருத்துவத் தேவைக்காகப் பயணிகளுக்கு முதலுதவி மையங்கள் மற்றும் அவசரகாலச் சிகிச்சைக்கான ஏற்பாடுகளை ரயில்வே செய்துள்ளது. இருப்பினும், ஒரு சாதாரணத் தலைவலி மாத்திரைக்கோ அல்லது அவசரத் தேவைக்கான மருந்து வாங்குவதற்கோ, பயணிகள் ரயில் நிலையத்தை விட்டு வெளியே செல்ல வேண்டிய நிலை உள்ளது. இது லட்சக்கணக்கான பயணிகளுக்கு கடுமையான சிரமத்தை ஏற்படுத்தி வந்தது குறித்துப் பல விமர்சனங்கள் எழுப்பப்பட்டன.
மத்திய அரசின் புதிய திட்டம் :
மேலே குறிப்பிட்ட குறைகள் அனைத்தையும் எதிர்கொள்ளும் வகையில், மத்திய அரசு தற்போது ஒரு முக்கிய முடிவை எடுத்துள்ளது. ‘பிரதம மந்திரி பாரதிய ஜன் ஒளஷதி பரியோஜனா’ (Pradhan Mantri Bhartiya Janaushadhi Pariyojana – PMBJP) என்ற திட்டத்தின் கீழ், மலிவு விலையில் மருந்துகளை விற்கும் கடைகளை தமிழ்நாட்டிலுள்ள முக்கியமான ரயில் நிலையங்கள் உட்பட நாட்டில் உள்ள அனைத்து ரயில் நிலையங்களிலும் படிப்படியாக கொண்டு வரப்போவதாக அறிவிக்கப்பட்டுள்ளது. இந்த திட்டத்தின் மூலம், கூடிய விரைவிலேயே அனைத்து ரயில் நிலையங்களிலும் மருந்து கடைகள் அமைவதைப் பயணிகள் எதிர்பார்க்கலாம்.
