இன்றைய அவசர உலகில், அலுவலகம் மற்றும் பள்ளி, கல்லூரிக்கு செல்வோர் பலர் காலை உணவை தவிர்த்துவிடுகின்றனர். இது ஆரோக்கியத்திற்கு மிகவும் தவறு என்று சுகாதார நிபுணர்கள் எச்சரிக்கின்றனர். காலை உணவை சமைத்து உண்ண நேரமில்லாதவர்கள், ஊட்டச்சத்துக்கள் நிறைந்த ஸ்மூதி (Smoothie) போன்ற திரவ உணவுகளை உட்கொள்வது நல்லது.
குறிப்பாக, செவ்வாழைப்பழத்தைப் பயன்படுத்திச் செய்யப்படும் ஸ்மூதி, மதிய உணவு நேரம் வரை பசியை கட்டுப்படுத்தி, வயிறு நிரம்பிய உணர்வை தரும். செவ்வாழையில் ஏராளமான சத்துக்கள் இருப்பதால், இதை சிறியவர்கள் முதல் பெரியவர்கள் வரை அனைவரும் சாப்பிடலாம் (சர்க்கரை நோயாளிகள் மட்டும் மருத்துவர் ஆலோசனையுடன் எடுத்துக்கொள்ளலாம்).
தேவையான பொருட்கள் :
செவ்வாழை – 1
அத்திப்பழம் – 2
பேரீச்சம்பழம் – 2
பால் – 50 மில்லி
முந்திரி, திராட்சை (துண்டு துண்டாக வெட்டியது) – சிறிது
தேவைப்பட்டால் மட்டும் தேன் சேர்த்துக்கொள்ளலாம். அத்திப்பழம் மற்றும் பேரீச்சம்பழத்தின் இனிப்பே போதுமானதாக இருக்கும்.
செய்முறை :
* முதலில், அத்திப்பழம் மற்றும் பேரீச்சம்பழத்தை எடுத்து, அவற்றைச் சிறிது வெந்நீரில் போட்டு ஊற வைக்கவும்.
* செவ்வாழைப்பழத்தின் தோலை உரித்துச் சிறிய துண்டுகளாக வெட்டித் தயாராக வைக்கவும்.
* இப்போது, ஒரு பிளண்டரை எடுத்துக்கொண்டு, ஊற வைத்த அத்திப்பழம் மற்றும் பேரீச்சம்பழத்தை, அவை ஊறிய தண்ணீருடன் சேர்த்து முதலில் நன்கு அரைக்கவும்.
* பிறகு, வெட்டி வைத்திருக்கும் வாழைப்பழ துண்டுகள் மற்றும் 50 மில்லி பாலைச் சேர்த்து, மீண்டும் பிளண்டரில் போட்டு மிருதுவாகும் வரை அரைக்கவும்.
இந்த ஸ்மூதியைச் சற்றுச் சில்லென்று குடிக்க விரும்பினால், அரைக்கும்போதே மூன்று ஐஸ் கட்டிகளை தூளாக்கி சேர்த்து அரைக்கலாம். அல்லது, அரைத்த பிறகு, நறுக்கிய முந்திரி, திராட்சை ஆகியவற்றைச் சேர்த்து, சிறிது நேரம் ஃப்ரீசரில் வைத்து, குளிர்ந்த பிறகுப் பரிமாறலாம்.
ஆரோக்கிய நன்மைகள் :
இந்த ஸ்மூதி குழந்தைகளுக்கும் பெரியவர்களுக்கும் மிகவும் சத்தான உணவாகும். அத்திப்பழம் மற்றும் பேரீச்சம்பழத்தில் அதிக அளவில் இரும்புச்சத்து இருப்பதால், இது ரத்த சோகை வராமல் தடுக்கும். மேலும், செவ்வாழையில் இரத்த ஓட்டத்தை மேம்படுத்தும் மற்றும் உற்பத்தி செய்யும் ஊட்டச்சத்துக்கள் நிறைந்துள்ளன. எனவே, இந்தச் சத்தான ஸ்மூதி காலையில் உங்களுக்கு தேவையான ஆற்றலை அளித்து, மதியம் வரை புத்துணர்ச்சியுடன் செயல்பட உதவும்.
பொறுப்புத் துறப்பு : மேற்கண்ட விவரங்கள் அனைத்தும் சமூக வலைதளங்களில் வரும் மருத்துவ நிபுணர்களின் தனிப்பட்ட கருத்துக்களாகும். இவற்றின் உண்மைத் தன்மையை Tamil Xpress இணையதளம் உறுதிப்படுத்தவில்லை.
