தமிழ்நாட்டில் கண்பார்வை குறைபாடுள்ள பள்ளி மாணவர்களுக்கான இலவச கண்ணாடி வழங்கும் திட்டத்தை இந்த ஆண்டு இறுதிக்குள் நிறைவு செய்ய திட்டமிடப்பட்டுள்ளதாக சுகாதாரத்துறை அமைச்சர் மா. சுப்பிரமணியன் தெரிவித்துள்ளார்.
சென்னை எழும்பூர் அரசு கண் மருத்துவமனையில் செய்தியாளர்களிடம் பேசிய அவர், மாநிலத்தின் கண்பார்வை குறைபாடுகளின் புள்ளி விவரங்களையும் அவர் வெளியிட்டார். அவர் பேசுகையில், “மாநிலத்தில் கண்புரை குறைபாடு 82 சதவீதமாகவும், விழித்திரை பாதிப்பு 5.6 சதவீதமாகவும், நீரிழிவு நோய் விழித்திரை பாதிப்பு 1 சதவீதமாகவும் மற்றும் கண் நீரழுத்த நோய் பாதிப்பு 1.3 சதவீதமாகவும் உள்ளது. மற்ற வகை குறைபாடுகள் 10.1 சதவீதம் ஆகும்” என்று விளக்கினார்.
மேலும், கண்டறியப்பட்டுள்ள குறைபாடுகளில் 14.3 சதவீதத்தினருக்கு கண் கண்ணாடி வழங்குவதன் மூலம் பார்வையை சரிசெய்ய வாய்ப்பு உள்ளதாகவும் அவர் தெரிவித்தார். அதேபோல், பள்ளி மாணவர்களிடையே கண்பார்வை குறைபாடுகளை கண்டறியும் திட்டம் குறித்துப் பேசிய அமைச்சர், “தமிழ்நாட்டில் இந்த ஆண்டு இதுவரையில் 27 லட்சத்து 90 ஆயிரத்து 93 பள்ளி மாணவர்களுக்குக் கண் பரிசோதனை மேற்கொள்ளப்பட்டுள்ளது. இதில் 2 லட்சத்து 214 சிறார்களுக்குப் பார்வைக் குறைபாடு இருப்பது கண்டறியப்பட்டுள்ளது” என்று கூறினார்.
மீதமுள்ள பள்ளி மாணவர்களுக்கும் விரைவில் பரிசோதனை செய்து, இந்த ஆண்டு இறுதிக்குள் மொத்தமாக 3 லட்சம் பள்ளிச் சிறார்களுக்கு இலவசமாக கண் கண்ணாடி வழங்குவதற்கு ஏற்பாடு செய்யப்பட்டுள்ளதாக அமைச்சர் மா.சுப்பிரமணியன் தெரிவித்துள்ளார்.
