ஆப்பிரிக்கா மற்றும் ஆசிய நாடுகளில், இருமல் சிரப்புகளைப் பயன்படுத்தியதால் குழந்தைகள் உயிரிழந்த தொடர் சம்பவங்களின் எதிரொலியாக, இந்தியா முழுவதும் இருமல் சிரப்புகள் விற்பனை முறையில் மிகப்பெரிய மாற்றத்தை ஏற்படுத்த மத்திய அரசு பரிசீலனை செய்து வருகிறது. அதன்படி, இனிமேல் சாதாரண இருமல் சிரப்புகளை கூட மருத்துவரின் பரிந்துரை இல்லாமல் மருந்துக் கடைகளில் வாங்க முடியாத நிலை உருவாக வாய்ப்புள்ளது.
சமீபத்தில் நடந்த பல சம்பவங்களில், குழந்தைகளுக்கு வழங்கப்பட்ட இருமல் சிரப்புகளில் அனுமதிக்கப்பட்ட அளவை மீறிய அல்லது விஷத்தன்மை கொண்ட இரசாயனங்கள் கலந்திருந்தது கண்டறியப்பட்டது. இவை பெரும்பாலும் சிறுநீரக செயலிழப்புக்கு (Kidney Damage) வழிவகுத்தன. இதில் குறிப்பிடத்தக்கது, ஒரு மாதத்திற்கு முன்பு மத்தியப் பிரதேசத்தில் நடந்த துயரச் சம்பவம். அங்கு விற்கப்பட்ட இருமல் சிரப்பில், மிகச் சிறிய அளவில் கூட உயிருக்கு ஆபத்தை விளைவிக்கக்கூடிய டையெத்திலீன் க்ளைகால் (Diethylene Glycol) என்ற இரசாயனம் அளவுக்கு அதிகமாக கலந்திருந்ததால், சில குழந்தைகள் உயிரிழந்ததாக கூறப்பட்டது.
இந்தச் சம்பவத்தைத் தொடர்ந்து, பாதிக்கப்பட்ட இருமல் சிரப் சந்தையில் இருந்து திரும்பப் பெறப்பட்டது. மேலும், உலக சுகாதார அமைப்பு (WHO) கட்டுப்பாடற்ற முறையில் விற்கப்படும் இத்தகைய சிரப்புகள் கடுமையான ஆரோக்கிய அபாயத்தை ஏற்படுத்தும் என்று உலக அளவில் எச்சரிக்கை விடுத்தது. இதுபோன்ற தொடர் சம்பவங்களால், குறிப்பாக சிறு குழந்தைகளுக்குக் கொடுக்கப்படும் திரவ மருந்துகளின் பாதுகாப்பு குறித்து மத்திய அரசுக்கு கவலை எழுந்துள்ளது.
இந்த அபாயங்களைக் கருத்தில் கொண்டு, இந்த விவகாரம் தற்போது மருந்து ஆலோசனைக் குழுவின் (Drugs Consultative Committee – DCC) பரிசீலனைக்கு சமர்ப்பிக்கப்பட்டுள்ளது. இதில் வைக்கப்பட்டுள்ள முக்கிய முன்மொழிவு என்னவென்றால், இருமல் சிரப்புகளை, மருந்து விற்பனை உரிமம் இல்லாமல் விற்க அனுமதிக்கப்பட்ட மருந்துகளின் பட்டியலான Schedule K-இலிருந்து நீக்க வேண்டும் என்பதுதான்.
தற்போது, பாராசிட்டமால், களிம்புகள் (Balms), ஆண்டாசிட் மருந்துகள், மூக்கடைப்புக்கான இன்ஹேலர்கள், இருமல் சிரப்புகள் மற்றும் மாத்திரைகள் ஆகியவை Schedule K-இன் கீழ் வருகின்றன. இந்தப் பட்டியலில் உள்ள மருந்துகள், உரிமம் இல்லாவிட்டாலும், சீல் செய்யப்பட்ட பாக்கெட்டுகளில் விற்க அனுமதிக்கப்படுவதால், தொலைதூரக் கிராமங்களிலும் அடிப்படை மருந்துகள் எளிதாகக் கிடைக்கின்றன.
புதிய முன்மொழிவு நிறைவேற்றப்பட்டால், இருமல் சிரப்புகள் மட்டுமே Schedule K-இலிருந்து நீக்கப்படும். இதன் பொருள், இனி இருமல் சிரப் வாங்கச் செல்லும்போது, கண்டிப்பாக மருத்துவரின் பரிந்துரை கடிதம் (Prescription) தேவைப்படும். இருப்பினும், முன்மொழிவில் இருமல் மாத்திரைகள் அல்லது லோசன்ஜ்கள் குறித்து எந்த மாற்றமும் செய்யப்படவில்லை. எனவே, அவை தொடர்ந்து பரிந்துரை கடிதம் இல்லாமல் எளிதாக கிடைக்கலாம். இந்த மாற்றம், இந்திய மருத்துவச் சந்தையில் மிக முக்கியமான ஒழுங்குமுறையாகவும், குழந்தைகள் பாதுகாப்பை உறுதி செய்யும் நடவடிக்கையாகவும் பார்க்கப்படுகிறது.
