அன்றாட தனிப்பட்ட தேவைகளுக்காக உலகம் முழுவதும் கோடிக்கணக்கானோரால் பயன்படுத்தப்பட்டு வரும் செயற்கை நுண்ணறிவு சாட்பாட்களின் (Artificial Intelligence Chatbot) மீதான நம்பிக்கை, மருத்துவத் துறையில் ஆபத்தை விளைவிப்பதாக கூறி, ஹைதராபாத்தைச் சேர்ந்த மருத்துவர்கள் கடுமையான எச்சரிக்கை விடுத்துள்ளனர். சமீபத்தில் உலகளவில் நடைபெற்ற இரண்டு விபரீத சம்பவங்களே இந்த எச்சரிக்கைக்கு பின்னணியாக உள்ளன.
சமீபத்திய சம்பவங்களில் ஒன்றாக, 30 வயதுடைய ஒரு பெண்ணுக்கு சிறுநீரக மாற்று அறுவை சிகிச்சை செய்யப்பட்டிருந்தது. சுமார் 7 ஆண்டுகள் டயாலிசிஸ் சிகிச்சை பெற்று வந்த அவர், அறுவை சிகிச்சைக்கு பின் கட்டாயம் எடுக்க வேண்டியிருந்த ஆண்டிபயாடிக் மருந்துகளை (Antibiotic Medicines) நிறுத்த முடிவு செய்தார். இதற்காக, அவர் சாட்ஜிபிடி-யிடம் ஆலோசனை கேட்டுள்ளார்.
ரத்தத்தில் கெரடின் (Creatinine) அளவு திருப்திகரமாக இருந்தால், மருந்தை தொடர வேண்டியதில்லை என்ற ஏ.ஐ.யின் ஆலோசனையை நம்பி, அவர் மருந்துகளை நிறுத்தியுள்ளார். இதன் விளைவாக,அவருக்கு பொருத்தப்பட்ட விலையுயர்ந்த சிறுநீரகமும் செயலிழந்துள்ளதாக மருத்துவர்கள் அதிர்ச்சி தகவலை வெளியிட்டுள்ளனர்.
அதேபோல், நியூயார்க்கில் நடந்த மற்றொரு சம்பவத்தில், சர்க்கரை நோயால் பாதிக்கப்பட்ட 60 வயது முதியவர் ஒருவர், உடல் எடை குறைப்பதற்காக சாட்ஜிபிடி கூறிய உணவுத் திட்டத்தைப் பின்பற்றியுள்ளார். அந்த ஏ.ஐ. சாட்பாட், அவரது உணவில் உப்பை முழுவதுமாக தவிர்க்கும்படி அறிவுறுத்தியுள்ளது. இந்த ஆலோசனையை பின்பற்றி டயட்டில் இருந்த அவருக்கு, உடலில் சோடியம் அளவு வெகுவாக குறைந்து, திடீரென உடல் எடை இழப்பு மற்றும் சிக்கல்கள் ஏற்பட்டன. இதையடுத்து, அவர் உடனடியாக மருத்துவமனையில் அனுமதிக்கப்பட்டார்.
மருத்துவர்கள் வேண்டுகோள் :
இந்த விபரீத சம்பவங்களை குறிப்பிட்டுப் பேசும் மருத்துவர்கள், “சாட்ஜிபிடி போன்ற செயற்கை நுண்ணறிவு சாட்பாட்கள் வெறும் உடல்நலம் குறித்த பொதுவான தகவல்களுக்காக மட்டுமே. இது தனிநபரின் மருத்துவ ஆலோசனைக்கானது அல்ல” என்று திட்டவட்டமாக தெரிவிக்கின்றனர். பலர், ஏ.ஐ.யை மருத்துவர்களை விட சிறந்தது என்று கருதுகிறார்கள்.
ஆனால், ஒரு தனிநபரின் சிக்கலான மருத்துவ வரலாறு, தற்போதைய மருந்துகள் மற்றும் உடலியல் தேவைகள் ஆகியவற்றை ஒருபோதும் சாட்பாட்டுகளால் முழுமையாக புரிந்துகொள்ள முடியாது. எனவே, பொதுமக்கள் தங்கள் ஆரோக்கியம் குறித்த விஷயங்களில் மிகுந்த கவனத்துடன் செயல்பட்டு, மருத்துவர்களை மட்டுமே அணுக வேண்டும் என அவர்கள் வலியுறுத்தியுள்ளனர்.
Read More : மின் இணைப்பின் உரிமையாளர் பெயரை மாற்ற வேண்டுமா..? இனி வீட்டிலிருந்து நீங்களே வேலையை முடிக்கலாம்..!!
