நீங்கள் கொடுத்த SIR படிவத்தின் தற்போதைய நிலை என்ன..? ஆன்லைனில் தெரிந்து கொள்ளலாம்..!!

இந்திய தேர்தல் ஆணையம் தற்போது, வாக்காளர் சிறப்புத் தீவிர திருத்தப் பணிகளை (Special Intensive Revision – SIR) மேற்கொண்டு வருகிறது. இதன் மூலம், வாக்காளர் பட்டியலில் புதிதாக சேர்ப்பது அல்லது விவரங்களை திருத்துவது போன்ற படிவங்களைப் பூர்த்தி செய்து, பொதுமக்கள் தங்கள் வாக்குச்சாவடி நிலை அலுவலர்களிடம் வழங்குவது வழக்கம்.

ஆனால், நாம் கொடுத்த படிவம் உண்மையில் தேர்தல் ஆணையத்தின் இணையதளத்தில் பதிவேற்றம் செய்யப்பட்டுவிட்டதா என்பதில் பலருக்கும் குழப்பம் இருக்கும். இதை கண்டறிய, வாக்காளர்களே நேரடியாக சில எளிய படிகளைப் பின்பற்றி அறிந்து கொள்வதற்கான வழிமுறைகளை இங்கே பார்க்கலாம்.

ஆன்லைனில் நிலையை சரிபார்க்கும் வழிமுறைகள் :

வாக்காளர் சிறப்புத் தீவிர திருத்தப் படிவத்தின் நிலையை அறிய, இந்திய தேர்தல் ஆணையத்தின் வாக்காளர் சேவை இணையதளப் பக்கத்தை (VOTERS’ SERVICE PORTAL) பயன்படுத்தலாம்.

* முதலில், voters.eci.gov.in/login என்ற இணையதளப் பக்கத்திற்குச் செல்ல வேண்டும்.

* நீங்கள் புதிதாக இணையதளத்தைப் பயன்படுத்துபவர் என்றால், உங்கள் பெயர் மற்றும் செல்போன் எண்ணைக் கொடுத்து, ‘சைன்-அப்’ செய்ய வேண்டும். அப்போது, உங்கள் மொபைல் எண்ணுக்கு வரும் ஓ.டி.பி. (OTP) எண்ணை உள்ளீடு செய்து பதிவு செய்வதை உறுதி செய்ய வேண்டும். (ஒருமுறை பதிவு செய்தால், அடுத்தடுத்த முறைகளுக்குப் பயனர்பெயர் மற்றும் கடவுச்சொல் மூலம் ‘லாக்-இன்’ செய்துகொள்ளலாம்).

* உள்நுழைந்த பிறகு, எஸ்.ஐ.ஆர். 2026 தொடர்பான பகுதியைக் கண்டறிந்து, அதில் உள்ள “Fill Enumeration Form” என்ற இணைப்பைக் கிளிக் செய்ய வேண்டும்.

* இப்போது, வாக்காளரின் மாநிலம் மற்றும் வாக்காளர் அடையாள அட்டையின் எண் (EPIC Number) ஆகியவை கேட்கப்படும். இந்த விவரங்களைச் சரியாக உள்ளீடு செய்ய வேண்டும்.

* நீங்கள் கொடுத்த விவரம் அதிகாரிகளால் ஏற்கப்பட்டு, இணையதளத்தில் பதிவேற்றம் செய்யப்பட்டு இருந்தால், ”Submitted” என்று திரையில் காட்டும்.

* அவ்வாறு காட்டாமல், “ஆதார் படிவத்தை சமர்ப்பிக்கவும்” என்று காட்டினால், உங்கள் வாக்குச்சாவடி நிலை அலுவலர் (BLO) உங்கள் படிவத்தை இன்னும் பதிவேற்றம் செய்யவில்லை என்று பொருள்.

இந்த சேவைப் பக்கத்திலேயே, உங்கள் வாக்குச்சாவடி நிலை அலுவலரின் பெயர் மற்றும் அவரது தொலைபேசி எண் போன்ற விவரங்களையும் பார்க்கலாம். எனவே, உங்கள் படிவம் நிலுவையில் இருந்தால், நீங்கள் உடனடியாக BLO-வைத் தொடர்புகொண்டு அது குறித்த விவரங்களை அறிந்துகொள்ள முடியும். வாக்காளர்கள் இந்த வாய்ப்பைப் பயன்படுத்தி, தங்கள் வாக்காளர் பட்டியலில் உள்ள விவரங்களின் நிலையைச் சுயமாக உறுதிப்படுத்திக் கொள்வது அவசியம்.