திருவண்ணாமலை மாவட்டம் ஜவ்வாது மலைப் பகுதியில் உள்ள பிரசித்தி பெற்ற கோவிலூர் சிவன் கோவிலில், கருவறை சீரமைப்பிற்காக பள்ளம் தோண்டியபோது 100-க்கும் மேற்பட்ட தங்கக் காசுகள் புதையலாக கண்டெடுக்கப்பட்ட சம்பவம் பரபரப்பை ஏற்படுத்தியுள்ளது.
3-ம் ராஜராஜ சோழன் ஆட்சிக் காலத்தில் கட்டப்பட்டதாக கருதப்படும் இந்த கோவிலில் தற்போது சீரமைப்புப் பணிகள் நடைபெற்று வருகின்றன. அந்த வகையில், சிதைவடைந்த நிலையில் இருந்த கோவிலின் கருவறையைப் புதிதாக கட்டுவதற்காக நேற்று (நவ.3) தொழிலாளர்கள் பள்ளம் தோண்டினர். சில அடி ஆழம் தோண்டியபோது, மண்ணுக்குள் புதைந்திருந்த ஒரு புதையலை தொழிலாளர்கள் கண்டுபிடித்தனர்.
புதையலை மீட்டுப் பார்த்தபோது, அதில் 100-க்கும் அதிகமான தங்கக் காசுகள் இருந்தது உறுதி செய்யப்பட்டது. இதுகுறித்து உடனடியாக அரசு அதிகாரிகளுக்குத் தகவல் தெரிவிக்கப்பட்டது. இதையடுத்து, சம்பவ இடத்திற்கு விரைந்து வந்த அதிகாரிகள், கோவிலின் கருவறையில் கண்டெடுக்கப்பட்ட காலத்தால் அழியாத தங்கக் காசுகளைப் பெற்றுக் கொண்டனர். இந்தத் தங்கக் காசுகள் சோழர் காலத்தைச் சேர்ந்தவையாக இருக்கலாம் என நம்பப்படுகிறது. மீட்கப்பட்ட காசுகளை ஆய்வு செய்து வருவதாகவும், அதன் வரலாற்றுப் பின்னணி மற்றும் மதிப்பு குறித்து விரைவில் அறிவிக்கப்படும் என்றும் அதிகாரிகள் தெரிவித்துள்ளனர்.
Read More : ஆதாரில் முகவரி, செல்போன் எண் மாற்ற இனி எங்கும் அலைய வேண்டாம்..!! அறிமுகமாகிறது புதிய செயலி..!!
