நெல்லையை சேர்ந்த சூர்யா (28) என்ற இளைஞர், திருமண தகவல் இணையதளங்களை பயன்படுத்தித் தான் ஒரு பெரிய தொழிலதிபர் எனக் கூறி, 50-க்கும் மேற்பட்ட இளம்பெண்களை ஏமாற்றி, நகை மற்றும் பணத்தை பறித்து உல்லாசமாக சுற்றித் திரிந்த சம்பவம் பெரும் அதிர்ச்சியை ஏற்படுத்தியுள்ளது.
சூர்யா விரித்த வலையில் சிக்கி, பாதிக்கப்பட்ட சென்னை அண்ணா நகரைச் சேர்ந்த ஒரு இளம்பெண் அளித்த புகாரின் பேரில், தற்போது சூர்யாவை போலீசார்ர் கைது செய்துள்ளனர். போலீஸார் அளித்த தகவலின்படி, சூர்யா திருமண இணையதளத்தில், வெளிநாடுகளுக்கு ஏற்றுமதி செய்யும் தொழிலை செய்வதாக பதிவு செய்துள்ளார்.
இவரை நம்பித் தொடர்பு கொண்ட இளம்பெண்களிடம், திருமணம் செய்வதாக கூறி பழகி, நெருங்கி வந்துள்ளார். மேலும், தனது மோசடியை நம்ப வைப்பதற்காக, பென்ஸ் உள்ளிட்ட விலை உயர்ந்த சொகுசு கார்கள் மற்றும் பங்களாக்களை வாடகைக்கு எடுத்து, அவை தனக்கே சொந்தமானது போல நடித்து அவர்களை ஏமாற்றியுள்ளார்.
இவரது ஆடம்பரமான தோற்றத்தையும், பொய் வார்த்தைகளையும் நம்பி திருமணம் செய்யும் ஆசையில் பழகிய பல பெண்களை சூர்யா ஏமாற்றி, அவர்களுடன் உல்லாசமாக இருந்துள்ளார். அதோடு நிற்காமல், அந்தப் பெண்களிடம், இதேபோல் கார், பங்களா வாங்குவதாகவும், இடம் வாங்கி தருவதாகவும் கூறி, அவர்களிடம் இருந்து நகை, பணத்தை பறித்து ஆடம்பரமாக செலவு செய்து வந்துள்ளார்.
சூர்யா மீது பல பெண்கள் புகார் தெரிவித்த நிலையில், கடந்த இரண்டு மாதங்களுக்கு முன்பு அவர் கைது செய்யப்பட்டார். தொடர்ந்து அவரிடம் விசாரணை நடத்தியதில், சென்னை மற்றும் வெளி மாவட்டங்களைச் சேர்ந்த 50-க்கும் மேற்பட்ட பெண்களை ஏமாற்றி, பல லட்சம் ரூபாய் மோசடி செய்த அதிர்ச்சித் தகவல் வெளிவந்துள்ளது. சூர்யாவிடம் போலீஸார் தொடர்ந்து விசாரணை மேற்கொண்டு வருகின்றனர். திருமண இணையதளங்களில் பழகும் நபர்களிடம் பொதுமக்கள் எச்சரிக்கையாக இருக்க வேண்டும் என காவல்துறை அறிவுறுத்தியுள்ளது.
Read More : “விஜயகாந்த் செய்த தவறை நான் எப்போதும் செய்ய மாட்டேன்”..!! சீமான் பரபரப்பு பேட்டி..!!
