தமிழ்நாட்டில் ‘கலைஞர் மகளிர் உரிமைத் தொகை’ திட்டத்தின் கீழ், புதிதாக விண்ணப்பித்திருக்கும் லட்சக்கணக்கான குடும்பத் தலைவிகள், தங்களுக்கு எப்போது உதவித் தொகை கிடைக்கும் என்ற எதிர்பார்ப்புடன் காத்திருக்கின்றனர். இந்நிலையில், இறுதிக்கட்ட விண்ணப்பப் பதிவு நிறைவடையவுள்ள நிலையில், தகுதியுள்ள புதிய பயனர்களுக்கு டிசம்பர் 15-ஆம் தேதி முதல் உரிமைத் தொகை வழங்கப்படும் என்ற முக்கிய அறிவிப்பு வெளியாகியுள்ளது.
விண்ணப்பிக்க கடைசி வாய்ப்பு :
மகளிர் உரிமைத் தொகை திட்டத்தின் கீழ் விடுபட்ட மற்றும் புதிய பயனாளிகளை சேர்ப்பதற்காக, தமிழகம் முழுவதும் ‘உங்களுடன் ஸ்டாலின்’ என்ற பெயரில் சிறப்பு முகாம்கள் நடத்தப்பட்டன. இந்த முகாம்கள் மூலம் ஏராளமான குடும்பத் தலைவிகள் விண்ணப்பித்துள்ளனர். தற்போது அரசு வெளியிட்டுள்ள அறிவிப்பின்படி, இந்த சிறப்பு விண்ணப்ப முகாம்கள் வரும் நவம்பர் 15-ஆம் தேதியுடன் முடிவடைகின்றன.
இந்தத் தேதிக்குப் பிறகு யாரும் புதிதாக விண்ணப்பிக்க முடியாது என்றும் அரசு திட்டவட்டமாக அறிவித்துள்ளது. எனவே, இதுவரை இந்தத் திட்டத்தில் சேர விண்ணப்பிக்காத தகுதியுள்ள பெண்கள் உடனடியாக இந்தச் சந்தர்ப்பத்தைப் பயன்படுத்திக் கொள்ளுமாறு கேட்டுக்கொள்ளப்படுகிறார்கள்.
புதிய பயனாளிகளுக்கு காத்திருக்கும் தொகை :
முதல் கட்டமாக சுமார் 1.06 கோடி குடும்பத் தலைவிகளுக்கு மாதம் ரூ. 1,000 வழங்கப்பட்டு வருகிறது. இந்தச் சிறப்பு முகாம்கள் மூலம் பெறப்பட்ட விண்ணப்பங்களை அரசு அதிகாரிகள் ஆய்வு செய்து, தகுதியான பயனாளிகளைத் தேர்ந்தெடுக்கும் பணியில் தீவிரமாக ஈடுபட்டுள்ளனர். இந்தப் புதிய பயனாளிகளுக்கு, வரும் டிசம்பர் 15-ஆம் தேதி முதல் அவர்களது வங்கிக் கணக்கில் உரிமைத் தொகையான ரூ. 1,000 செலுத்தப்படும் என்று எதிர்பார்க்கப்படுகிறது.
இதன் மூலம், மாநிலத்தில் மகளிர் உரிமைத் தொகை பெறும் குடும்பங்களின் எண்ணிக்கை மேலும் கணிசமாக அதிகரிக்கும் எனத் தெரிகிறது. இந்த அறிவிப்பு, புதிதாக விண்ணப்பித்துள்ள குடும்பத் தலைவிகள் மத்தியில் பெரும் மகிழ்ச்சியையும் நிம்மதியையும் ஏற்படுத்தியுள்ளது.
Read More : 2026 பொது விடுமுறைப் பட்டியல் வெளியீடு..!! தமிழ்நாடு அரசு ஊழியர்கள், மாணவர்களுக்கு கொண்டாட்ட செய்தி..!!
