தொழில்நுட்பம் அசுர வளர்ச்சி அடைந்துள்ள இக்காலகட்டத்தில், ஒருவரை ரகசியமாக உளவு பார்ப்பது என்பது சிரமமான காரியம் அல்ல. குறிப்பாக கணவன் – மனைவி அல்லது காதலர்கள் ஒருவரை ஒருவர் அறியாமலேயே கண்காணிப்பதற்காக, ‘ஸ்பைவேர்’ எனப்படும் உளவு பார்க்கும் செயலிகளை பயன்படுத்துவது அதிகரித்துள்ளது.
இதுபோன்ற ஆபத்தான செயலிகள் ஆண்ட்ராய்டு மற்றும் ஐஓஎஸ் தளங்களில் எளிதாகக் கிடைக்கின்றன. இந்த செயலிகள் ஒருவரின் தொலைபேசியில் நிறுவப்பட்டுவிட்டால், அவர்கள் யாருடன் பேசுகிறார்கள், எங்கு செல்கிறார்கள், என்ன செய்திகளை பரிமாறுகிறார்கள் போன்ற அனைத்துத் தகவல்களையும் உளவு பார்க்க முடியும். உங்கள் ஸ்மார்ட்போனில் உளவு பார்க்கும் ஸ்பைவேர் நிறுவப்பட்டிருக்குமோ என்று உங்களுக்கு சந்தேகம் இருந்தால், அதைக் கண்டுபிடிப்பதற்கான வழிகள் உள்ளன.
ஸ்பைவேர் என்றால் என்ன..?
ஸ்பைவேர் என்பது ஒரு வகையான தீங்கிழைக்கும் மென்பொருள் (Malware) ஆகும். இது உங்கள் அனுமதி இல்லாமல், நீங்கள் என்ன செய்கிறீர்கள், நீங்கள் பயன்படுத்தும் கடவுச்சொற்கள், தனிப்பட்ட புகைப்படங்கள், முக்கியமான பாதுகாப்புத் தகவல்கள் மற்றும் இருப்பிடத்தை ரகசியமாக கண்காணிக்கிறது.
ஐபோன்கள் அதன் பாதுகாப்பான அமைப்பு காரணமாக சற்று பாதுகாப்பாக இருந்தாலும், ஆண்ட்ராய்டு போன்களில் Google Play Protect போன்ற அம்சங்கள் இருந்தாலும், எந்த ஒரு ஸ்மார்ட்போனும் 100% பாதுகாப்பானது அல்ல. இவற்றையெல்லாம் மீறி, யாரோ ஒருவர் இந்த ஸ்பைவேரை உங்கள் தொலைபேசியில் நிறுவி உளவு பார்க்க வாய்ப்புள்ளது.
உங்களை உளவு பார்க்கிறார்கள் என்பதன் அறிகுறிகள் :
உங்கள் தொலைபேசியில் ஸ்பைவேர் இருந்தால், அது சத்தமில்லாமல் பின்னணியில் தொடர்ந்து இயங்கிக் கொண்டே இருக்கும்.
பேட்டரி சீக்கிரம் காலி : நீங்கள் போனைப் பயன்படுத்தாதபோதும், பேட்டரி மிக வேகமாகத் தீர்ந்து போனால், பின்னணியில் ஒரு செயலி ரகசியமாக இயங்குகிறது என்று அர்த்தம்.
போன் சூடாவது : நீங்கள் பெரிய அப்ளிகேஷன்களை பயன்படுத்தாதபோதும், உங்கள் தொலைபேசி அடிக்கடி சூடாகினால் அது ஸ்பைவேராக இருக்கலாம்.
தரவு பயன்பாடு அதிகரிப்பு : எந்தப் பதிவிறக்கமோ அல்லது வீடியோ ஸ்ட்ரீமிங்கோ செய்யாமல், உங்கள் இன்டர்நெட் டேட்டா பயன்பாடு திடீரென அதிகரித்தால், அது உளவு பார்க்கும் செயலிகளால் தரவுகள் திருடப்படுவதாக இருக்கலாம்.
விசித்திரமான மாற்றங்கள் : உங்கள் அனுமதி இல்லாமல் தொலைபேசி மறுதொடக்கம் செய்யப்பட்டால் அல்லது நீங்கள் ஒருபோதும் பதிவிறக்கம் செய்யாத புதிய பயன்பாடுகளை உங்கள் திரையில் கண்டால், அல்லது உங்கள் செட்டிங்குகள் மாறியிருந்தால் நீங்கள் உஷாராக வேண்டும்.
ஸ்பைவேரில் இருந்து தற்காப்பது எப்படி..?
* தொலைபேசியின் ‘அமைப்புகள் (Settings)’ பகுதிக்குச் சென்று, பயன்பாடுகள் (Apps) பிரிவில் உள்ள, உங்களுக்கு தேவையில்லாத மற்றும் சந்தேகத்திற்கிடமான அனைத்துச் செயலிகளையும் உடனடியாக நீக்க வேண்டும்.
* ‘பாதுகாப்பு மற்றும் தனியுரிமை’ பிரிவில், எந்தெந்தச் செயலிகளுக்கு ‘இருப்பிடம், மைக்ரோஃபோன் மற்றும் கேமரா அணுகல்’ போன்ற அனுமதிகளை வழங்கியுள்ளீர்கள் என்பதைச் சரிபார்த்து, அனாவசியமான அனுமதிகளை நீக்க வேண்டும்.
* ஸ்பைவேர் இருப்பதற்கான சந்தேகம் உறுதியானால், உங்கள் மொபைலை முதலில் ஃபேக்டரி ரீசெட் (Factory Reset) செய்வது நல்லது. இது எல்லாத் தரவுகளையும் அழித்து, தொலைபேசியை புதிய நிலைக்குக் கொண்டுவரும்.
* அனைத்து செட்டிங்களையும் உடனடியாக மாற்றவும். பொது வைஃபை இணைப்புகளைப் பயன்படுத்துவதைத் தவிர்க்கவும். கட்டணம் செலுத்தி வாங்கும் வகையிலான நல்ல ஆன்டிவைரஸ் (Anti-virus) பயன்பாட்டை நிறுவி பயன்படுத்துவது உங்கள் பாதுகாப்பை உறுதி செய்யும்.
Read More : தங்க நகைகள் சேமிப்பில் அமெரிக்காவையே மிஞ்சும் தமிழ்நாட்டு பெண்கள்..!! மொத்தம் எத்தனை டன்கள் தெரியுமா..?
