இந்தியாவில் கோடிக்கணக்கான ஏழை, எளிய மற்றும் நடுத்தர மக்கள், குறிப்பாக நகர்ப்புறங்களில் வாடகை வீடுகளை நம்பி வாழ்கின்றனர். இவர்களது நீண்டகால குழப்பங்கள் மற்றும் சிரமங்களைத் தீர்க்கும் வகையில், அரசாங்கம் ஒரு புதிய சட்டத்தை அமல்படுத்தியுள்ளது. அதுதான் “வாடகைச் சட்டம் 2025” (Model Tenancy Act).
இந்தச் சட்டம் நடைமுறைக்கு வருவதால், இனி வீட்டு வாடகை விதிமுறைகள் துல்லியமான, வெளிப்படையான முறையில் அமலுக்கு வரும். வாடகைக்கு இருப்பவர்கள் மற்றும் புதிதாகச் செல்பவர்கள் இதுபற்றி அவசியம் தெரிந்துகொள்ள வேண்டும்.
புதிய சட்டம் ஏன் அவசியம்..?
தற்போது வரையில், இந்தியாவில் வீட்டு வாடகை பரிவர்த்தனைகள் பெரும்பாலும் வாய்மொழி ஒப்பந்தங்கள் அல்லது எளிய காகித ஒப்பந்தங்கள் மூலமே நடந்து வந்தன. இதனால், வாடகையின் அளவு, முன்பணம் (அட்வான்ஸ்), திடீர் வாடகை உயர்வு போன்ற விஷயங்களில் ஒவ்வொரு இடத்திலும் ஒவ்வொரு விதமான நடைமுறை இருந்தது. பலருக்கும் தங்களது உரிமைகள் என்னவென்று முழுமையாகத் தெரியவில்லை. இந்தக் குழப்பங்களுக்கு இந்த சட்டம் தீர்வு காண்கிறது.
வாடகைதாரர்களுக்கு முக்கிய சலுகைகள் :
புதிய வாடகை சட்டம், வாடகைக்கு வசிப்பவர்களுக்குப் பல முக்கியப் பாதுகாப்புச் சலுகைகளை வழங்குகிறது.
குறைந்த முன்பணம் (அட்வான்ஸ்): குடியிருப்பு வீடுகளுக்கான பாதுகாப்பு வைப்புத் தொகை (Security Deposit) இனி இரண்டு மாத வாடகைக்கு மேல் இருக்கக் கூடாது. இதனால், புதிதாக வீடு வாடகைக்கு எடுப்பவர்களின் ஆரம்ப நிதிச் சுமை குறையும்.
திடீர் வெளியேற்றம் இல்லை: இனி வீட்டு உரிமையாளர்கள் வாடகைதாரர்களை திடீரென வீட்டை காலி செய்யுமாறு கேட்க முடியாது. வீட்டை காலி செய்ய வேண்டுமென்றால், சட்டப்படி சரியான நடைமுறையை பின்பற்ற வேண்டும்.
வாடகை உயர்வு அறிவிப்பு: வாடகையை உயர்த்தும் திட்டம் இருந்தால், வீட்டு உரிமையாளர்கள் முன்கூட்டியே அதை வாடகைதாரர்களுக்கு அறிவிக்க வேண்டும். இதனால், வாடகைதாரர்கள் தங்கள் மாதச் செலவுகளை திட்டமிட எளிதாகும்.
பதிவு செய்வது கட்டாயம்: வாடகை ஒப்பந்தத்தை பதிவு செய்வது கட்டாயமாக்கப்பட்டுள்ளது. மேலும், ஒப்பந்தம் ஏற்பட்ட 2 மாதங்களுக்குள் அதை உள்ளூர் வாடகை ஆணையத்திடம் பதிவு செய்ய வேண்டும். இது ஒப்பந்தத்திற்கு அரசாங்க ரீதியான பாதுகாப்பை வழங்கும்.
வீட்டு உரிமையாளர்களுக்கான நன்மைகள் :
இந்த சட்டம் வாடகைதாரர்களுக்கு மட்டுமல்லாமல், வீட்டு உரிமையாளர்களுக்கும் சில நன்மைகளை கொடுக்கிறது.
டிடிஎஸ் வரம்பு உயர்வு: வாடகை வருமானத்தின் மீதான டிடிஎஸ் (TDS) வரம்பு ஆண்டுக்கு ரூ.2.4 லட்சத்தில் இருந்து ரூ.6 லட்சமாக உயர்த்தப்பட்டுள்ளது. இதனால், உரிமையாளர்களுக்கு வாடகைத் தொகை விரைவாகக் கிடைக்கும்.
வருமானக் கணக்கு எளிமை: 2025 ஏப்ரல் மாதம் முதல், வாடகை வருமானத்தை சொந்த சொத்தில் இருந்து வரும் வருமானமாக காட்டுவது எளிதாகும்.
விரைவான தீர்வு: ஒரு வாடகைதாரர் ஓராண்டில் 3 அல்லது அதற்கு மேற்பட்ட மாதங்கள் வாடகை செலுத்தவில்லை என்றால், வீட்டு உரிமையாளர்கள் அந்தப் பிரச்சனையை தீர்க்க, உடனடியாக வாடகை தீர்ப்பாயத்தை அணுகலாம்.
பிரச்சனைகளுக்கு 60 நாட்களுக்குள் தீர்வு :
வாடகை தொடர்பான பிரச்சனைகளை தீர்ப்பதற்காக, இந்த சட்டத்தின் கீழ் வாடகைத் தீர்ப்பாயங்கள் உருவாக்கப்படும். இந்தத் தீர்ப்பாயங்கள் மூலம், வாடகை தொடர்பான பிரச்சனைகள் அனைத்தும் 60 நாட்களுக்குள் தீர்க்கப்படும்.
வாடகைதாரர்கள் இனி டிஜிட்டல் முறையில் முத்திரையிடப்பட்ட மற்றும் பதிவு செய்யப்பட்ட வாடகை ஒப்பந்தத்தைப் பெற வேண்டும். வாடகை, வைப்புத் தொகை மற்றும் பிற விதிமுறைகள் அனைத்தும் தெளிவாக உள்ளதா என்பதைச் சரிபார்த்த பின்னரே ஒப்பந்தத்தில் கையெழுத்திட வேண்டும். வீட்டு உரிமையாளர்களும் அரசாங்கத்தால் அங்கீகரிக்கப்பட்ட இ-ஸ்டாம்பிங் தளங்களை மட்டுமே பயன்படுத்த வேண்டும் என்று அறிவுறுத்தப்பட்டுள்ளது.
Read More : தோட்டத்து வீட்டில் பயங்கரம்..!! தனியாக இருந்த தம்பதியை கட்டிப்போட்டு 18 சவரன் நகைகள் கொள்ளை..!!
