காஞ்சிபுரம் வையாவூர் சாலையில் உள்ள பழைய ரயில் நிலையம் அருகே அதிக பாரம் ஏற்றிச் சென்ற சரக்கு லாரி ஒன்று திடீரென இரண்டாக உடைந்த சம்பவம் அப்பகுதியில் பரபரப்பை ஏற்படுத்தியது.
விபத்து நடந்தது எப்படி..?
பெல்லாரியில் இருந்து ரயில் மூலம் கொண்டுவரப்பட்ட கனரக இரும்பு ரோல்களை, காஞ்சிபுரம் பழைய ரயில் நிலையத்தில் இருந்து பல்வேறு தொழிற்சாலைகளுக்கு லாரிகள் மூலம் கொண்டு செல்லும் பணி நடைபெற்று வருகிறது. இந்த சூழலில், ஒரு கனரக லாரியில் பெரிய அளவிலான இரும்பு ரோல்கள் ஏற்றப்பட்டன.
அந்த லாரி வையாவூர் சாலையில் சென்றுகொண்டிருந்தபோது, அதிக பாரத்தை தாங்க முடியாமல் வாகனத்தின் பின்பகுதி திடீரென உடைந்து, சாலையில் சரிந்தது. இதன் விளைவாக, லாரியில் இருந்த கனமான இரும்பு ரோல்கள் சாலையில் உருண்டு விழுந்தன.
போக்குவரத்து பாதிப்பு :
இந்தச் சம்பவத்தால் சாலையில் இரும்பு ரோல்கள் சிதறிக் கிடந்ததால், அவ்வழியே சில மணி நேரம் போக்குவரத்து நெரிசல் ஏற்பட்டது. அதிர்ஷ்டவசமாக, இந்தச் சம்பவம் நடந்தபோது லாரிக்கு அருகில் யாரும் இல்லாததால், பெரும் விபத்து மற்றும் உயிரிழப்பு தவிர்க்கப்பட்டது.
இதையடுத்து, தகவலறிந்து உடனடியாக சம்பவ இடத்திற்கு விரைந்து வந்த போக்குவரத்துப் போலீசார், உடைந்த லாரியையும் சாலையில் சிதறிய இரும்பு ரோல்களையும் அப்புறப்படுத்தி போக்குவரத்தை சீர்செய்தனர்.
Read More : ஆதாரில் முகவரி, செல்போன் எண் மாற்ற இனி எங்கும் அலைய வேண்டாம்..!! அறிமுகமாகிறது புதிய செயலி..!!
