கோவை மாவட்டம் மேட்டுப்பாளையம் சாலையில் உள்ள கவுண்டம்பாளையத்தில், தமிழ்நாடு வீட்டுவசதி வாரியத்தால் கட்டப்பட்ட உயரமான குடியிருப்பில் மர்ம நபர்கள் புகுந்து 13 வீடுகளில் கொள்ளையடித்த சம்பவம் பரபரப்பை ஏற்படுத்தியது. இந்தக் கொள்ளைச் சம்பவத்தில் ஈடுபட்ட உத்தரப் பிரதேசத்தைச் சேர்ந்த 3 கொள்ளையர்களை, சம்பவம் நடந்த 24 மணி நேரத்திற்குள் காவல்துறையினர் அதிரடியாக சுட்டுப் பிடித்துள்ளனர்.
கவுண்டம்பாளையத்தில் உள்ள 14 மாடிகளைக் கொண்ட இந்தக் குடியிருப்பில் சுமார் 1,800 குடும்பங்கள் வசித்து வருகின்றன. இங்கு வசிப்பவர்களில் பெரும்பாலானோர் அரசு ஊழியர்கள் ஆவர். நேற்று இந்தக் குடியிருப்பில் அத்துமீறி நுழைந்த மர்ம நபர்கள், பூட்டியிருந்த வீடுகளைக் குறிவைத்துத் தங்கள் கொள்ளைச் சம்பவத்தைத் திட்டமிட்டுக் கையாண்டுள்ளனர்.
முதலில் ஒரு வீட்டில் நகை, பணத்தைக் கொள்ளையடித்துச் சென்றதாக கவுண்டம்பாளையம் காவல் நிலையத்தில் புகார் அளிக்கப்பட்டது. போலீசார் வந்து நடத்திய விசாரணையில், மொத்தம் 13 வீடுகளில் ஒரே நேரத்தில் கொள்ளைச் சம்பவத்தை மர்ம நபர்கள் அரங்கேற்றியது தெரியவந்தது. இதுவரை கிடைத்த தகவலின்படி, இந்தக் கொள்ளையில் 56 பவுன் நகை, ரூ.3 லட்சம் ரொக்கப் பணம் மற்றும் வெள்ளியால் ஆன நகைகள் திருடப்பட்டிருந்தன.
கொள்ளைச் சம்பவத்தின் தீவிரத்தைக் கருத்தில் கொண்டு, உடனடியாகக் காவல் துறையினர் மோப்பநாய் மற்றும் தடயவியல் நிபுணர்களை வரவழைத்தனர். கைரேகைகள் உள்ளிட்ட தடயங்கள் சேகரிக்கப்பட்டன. இந்தக் கொள்ளைச் சம்பவத்தில் ஈடுபட்டவர்களைப் பிடிக்க 3 தனிப்படைகள் அமைக்கப்பட்டன.
தனிப்படையினர் பல்வேறு கோணங்களில் தீவிர விசாரணை நடத்தி வந்த நிலையில், கொள்ளையர்கள் கோவை குனியமுத்தூர் அடுத்துள்ள குளத்துப்பாளையத்தில் பதுங்கியிருந்தது தெரியவந்தது. அவர்களைப் பிடிக்கச் சென்ற போலீசார், கொள்ளையர்கள் தப்ப முயன்றதாலும், ஏற்பட்ட சலசலப்பாலும், வேறு வழியின்றி அவர்களைச் சுட்டுப் பிடித்தனர். காயமடைந்த அந்தக் கொள்ளையர்கள் உடனடியாகக் கோவை அரசு மருத்துவமனையில் சிகிச்சைக்காக அனுமதிக்கப்பட்டனர்.
பிடிபட்ட 3 பேரும் உத்தரப் பிரதேசத்தைச் சேர்ந்தவர்கள் என்றும், 35 முதல் 40 வயதுக்குட்பட்டவர்கள் என்றும் விசாரணையில் தெரியவந்துள்ளது. குடியிருப்புப் பகுதிகளில் அடுத்தடுத்து நடந்த கொள்ளைச் சம்பவத்தில் ஈடுபட்டவர்களைக் காவல் துறையினர் 24 மணி நேரத்திற்குள் அதிரடியாகப் பிடித்து நடவடிக்கை எடுத்தது, பொதுமக்கள் மத்தியில் பாராட்டையும், நம்பிக்கையையும் ஏற்படுத்தியுள்ளது.
Read More : பக்கா ஸ்கெட்ச் போட்ட அமித்ஷா..!! செங்கோட்டையனை தவெகவில் இணைய சொன்னதே அவர் தான்..!! பரபரப்பு தகவல்..!!












