தமிழக காவிரி டெல்டா மாவட்டங்களின் விவசாயத் தேவைகளைப் பூர்த்தி செய்வதில் சேலம் மாவட்டத்தில் உள்ள மேட்டூர் அணை முக்கியப் பங்காற்றுகிறது. கர்நாடகாவின் குடகு மலையில் உருவாகும் காவிரி ஆறு, அங்குள்ள கிருஷ்ணராஜ சாகர், கபினி உள்ளிட்ட முக்கிய அணைகளில் நீர் சேகரிக்கப்பட்ட பிறகு, உபரி நீர் அவ்வப்போது மேட்டூரை வந்தடைகிறது. குறிப்பாக பருவமழைக் காலங்களில் அதிகப்படியான நீர்வரத்து இருக்கும்போது, அணை நிரம்பி வழிவது வழக்கம்.
இந்த ஆண்டு, காவிரி நீர்ப்பிடிப்புப் பகுதிகளில் நல்ல மழை பெய்ததால், காவிரி ஆற்றில் வெள்ளப்பெருக்கு ஏற்பட்டது. இந்த நீர்வரத்து பிலிகுண்டுலு வழியாக ஒகேனக்கல் அருவிகளில் ஆர்ப்பரித்துக் கொட்டி, பின்னர் மேட்டூர் அணையை வந்தடைந்தது. நடப்பாண்டில் மட்டும் மேட்டூர் அணை தனது முழு கொள்ளளவான 120 அடியை 7 முறை எட்டி புதிய சாதனை படைத்தது.
தற்போது வடகிழக்குப் பருவமழைக் காலம் என்றாலும், மழைப்பொழிவு சற்றுக் குறைவாக காணப்படுகிறது. இதன் காரணமாக, டெல்டா பாசனப் பகுதிகளில் நீர் தேவை அதிகரித்துள்ளது. இதற்கு முன்னதாக, மேட்டூர் அணையில் இருந்து டெல்டா பாசனத்திற்காக வினாடிக்கு 10,000 கன அடி வீதம் தண்ணீர் திறந்துவிடப்பட்டது. இடையில் பாசனப் பகுதிகளில் மழை நின்றதால், தண்ணீர் தேவை அதிகரித்தது. இதனைத் தொடர்ந்து, கடந்த சில நாட்களுக்கு முன்பு நீர் திறப்பு வினாடிக்கு 16,000 கன அடியாக அதிகரிக்கப்பட்டது.
இந்நிலையில், டெல்டா பாசனப் பகுதிகளில் விவசாயத் தேவை மேலும் அதிகரித்ததன் காரணமாக, தற்போது மேட்டூர் அணையில் இருந்து வெளியேற்றப்படும் தண்ணீரின் அளவு வினாடிக்கு 18,000 கன அடியாக மேலும் உயர்த்தப்பட்டுள்ளது. மேலும், கால்வாய் பாசன தேவைக்காக தொடர்ந்து வினாடிக்கு 500 கன அடி வீதம் தண்ணீர் திறந்து விடப்பட்டு வருகிறது.
Read More : அக்காள் கணவருடன் ரகசிய உறவு..!! திருமணமான 4 நாட்களில் மாப்பிள்ளையை விட்டு மாமாவுடன் ஓடிய கொழுந்தியாள்..!!
