தமிழ்நாட்டின் பல்வேறு மாவட்டங்களில் குறிப்பாக சேலம், ஈரோடு மற்றும் கரூர் பகுதிகளில், வினோதமான உடைகள் அணிந்து கொள்ளையர்கள் நடமாடி வரும் சம்பவம் பொதுமக்கள் மத்தியில் பீதியை ஏற்படுத்தியுள்லது.
சேலம் மாவட்டம் சூரமங்கலம் ரயில்வே சந்திப்பு பகுதியில் உள்ள மோட்டூர் பகுதியில், 4 பேர் கொண்ட மர்ம நபர்கள் ‘மங்கி குல்லா’ அணிந்தபடி வீடுகளுக்குள் நுழைய நோட்டமிட்டுள்ளனர். அதிகாலை 2 மணியளவில் சாலைகளில் நடமாடிய இந்த நால்வரும், காலில் செருப்பு அணியாமல், குளிருக்கு இதமாக ஜெர்கின் உடைகளை அணிந்து வந்துள்ளனர்.
அவர்கள் ஒரு வீட்டு வாசலில் நிறுத்தப்பட்டிருந்த இருசக்கர வாகனத்தை திருட முயன்றபோது, சத்தம் கேட்டு அந்த வீட்டின் உரிமையாளர்கள் விழித்து எழுந்தனர். உடனடியாக அந்த 4 பேரும் அங்கிருந்து தப்பியோடிவிட்டனர். இந்த சம்பவம் அப்பகுதி சிசிடிவி கேமராவில் பதிவாகியுள்ளது. அதில் ஒருவர் மட்டும் பின்னால் ஒரு பையை மாட்டிக்கொண்டிருப்பது பதிவாகியுள்ளது.
அதேபோல், ஈரோடு பகுதியிலும் இதுபோன்ற சம்பவம் நடந்துள்ளது. அதிகாலை 3.20 மணியளவில் ஒரு வீட்டின் சிசிடிவி காட்சியில், 4 முகமூடி அணிந்த நபர்கள் சிக்கியுள்ளனர். அவர்களின் நடமாட்டத்தை பார்த்து நாய்கள் தொடர்ந்து குரைக்கவே, அந்த மர்ம நபர்கள் நாய்கள் மீது கற்களை வீசி எறிந்துள்ளனர். பின்னர், ஒரு காரை சுற்றி வந்து நோட்டமிட்ட அவர்கள், ஒரு சந்தைப் பகுதிக்குள் நுழைந்து மறைந்துள்ளனர். இந்த வீடியோவும் தற்போது சமூக வலைத்தளங்களில் வைரலாகி வருகிறது.
இதேபோல், கரூர் மாவட்டத்தில் சாரல் மழை மற்றும் பனிப்பொழிவு அதிகரித்துக் கொண்டே இருப்பதால், மக்கள் வீடுகளுக்குள் தூங்கத் தொடங்கியுள்ள இந்தச் சூழலைப் பயன்படுத்திக் கொள்ளையர்கள் வித்தியாசமான பாணியைப் பின்பற்றி வருகின்றனர். வாட்டசாட்டமான தோற்றத்துடன் இருக்கும் இந்த மர்ம நபர்கள், உடலில் எண்ணெய் பூசிக்கொண்டு, உள்ளாடை மட்டுமே அணிந்தபடி முகமூடியுடன் நடமாடுகின்றனர். உள்ளாடையின் பின்புறம் தங்கள் செருப்பைச் சொருகி வைத்துள்ளனர்.
சமீபத்திய கொள்ளைச் சம்பவங்கள் : கடந்த 15-ஆம் தேதி அதிகாலை, கரூர் அருகே வெள்ளாளப்பட்டி பகுதியில் உள்ள மல்லிகா என்பவரின் வீட்டிற்குள் கொள்ளையர்கள் இருவர் புகுந்து ஒரு தங்க மூக்குத்தியை திருடிச் சென்றுள்ளனர்.
தாலிச் செயின் பறிப்பு : அதேபோல், சமீபத்தில் அரவக்குறிச்சி அருகே கொடையூர் கூலி நாயக்கனூர் பகுதியில் மாரப்பன் என்பவரது வீட்டில், 4 முகமூடி கொள்ளையர்கள் உருட்டுக் கட்டைகளுடன் புகுந்தனர். வீட்டில் தூங்கிக் கொண்டிருந்த அவரது மனைவி வனிதா (38) அணிந்திருந்த 5 பவுன் தாலிச் செயினை கொள்ளையர்கள் பறித்துச் சென்றுள்ளனர்.
முகமூடிக் கொள்ளையர்கள் மற்றும் உள்ளாடை கொள்ளையர்களின் இந்த அட்டகாசம் அதிகரித்துள்ளதால், பொதுமக்கள் பாதுகாப்பு கோரி வருகின்றனர். இந்தச் சம்பவங்களைத் தடுக்கவும், குற்றவாளிகளைப் பிடிக்கவும் போலீசார் இரவு நேர ரோந்துப் பணிகளைத் தீவிரப்படுத்த வேண்டும் என்ற கோரிக்கையும் வலுத்துள்ளது.
Read More : வாடகைதாரர்கள் vs வீட்டு உரிமையாளர்கள்..!! வந்தாச்சு புது ரூல்ஸ்..!! கண்டிப்பா தெரிஞ்சிக்கோங்க..!!
