தமிழ்நாட்டில் தற்போது நடைபெற்று வரும் வாக்காளர் பட்டியல் சிறப்புத் தீவிர திருத்தப் பணிகளுக்கான படிவங்களைச் சமர்ப்பிப்பதற்கான கால அவகாசம் நீட்டிக்கப்படாது என்று தமிழக தலைமை தேர்தல் அதிகாரி அர்ச்சனா பட்நாயக் திட்டவட்டமாக தெரிவித்துள்ளார். வாக்காளர்கள் அனைவரும் டிசம்பர் 4ஆம் தேதிக்குள் தங்கள் படிவங்களைப் பூர்த்தி செய்து சமர்ப்பிப்பது அவசியம் என்றும், தவறினால் அவர்களது பெயர்கள் வரைவு வாக்காளர் பட்டியலில் இடம்பெறாது என்றும் அவர் எச்சரித்துள்ளார்.
6.23 கோடி படிவங்கள் விநியோகம் நிறைவு :
இது தொடர்பாக தமிழக தேர்தல் ஆணையம் வெளியிட்டுள்ள செய்திக் குறிப்பில், தமிழ்நாட்டின் மொத்தமுள்ள 6.41 கோடி வாக்காளர்களில், இதுவரை 6.23 கோடி வாக்காளர்களுக்கு கணக்கீட்டுப் படிவங்கள் விநியோகிக்கப்பட்டுள்ளன. கணக்கீட்டுப் படிவங்கள் விநியோகப் பணிகளை விரைவுபடுத்தும் நோக்கில், மாவட்ட தேர்தல் அலுவலர்களால் அதிக எண்ணிக்கையிலான தன்னார்வலர்கள் நியமிக்கப்பட்டுள்ளனர். மேலும், ஏராளமான வாக்குச்சாவடிகளிலும் வாக்காளர்களுக்கு உதவ உதவி மையங்கள் அமைக்கப்பட்டுள்ளன.
வாக்காளர்கள் அனைவரும் காலக்கெடு முடியும் வரை காத்திருக்காமல், தங்களுக்கு வழங்கப்பட்ட கணக்கீட்டுப் படிவங்களை உடனடியாகப் பூர்த்தி செய்து, தங்கள் வாக்குச்சாவடி நிலை அலுவலரிடம் (BLO) அல்லது உதவி மையத்தில் சமர்ப்பிக்குமாறு கேட்டுக் கொள்ளப்படுகிறார்கள். படிவங்களைச் சமர்ப்பித்துள்ள அனைத்து வாக்காளர்களின் பெயர்களும் டிசம்பர் 9, 2025 அன்று வெளியிடப்படவுள்ள வரைவு வாக்காளர் பட்டியலில் இடம்பெறும்.
அரசியல் கட்சிகளின் பங்களிப்பு :
இந்த சிறப்புத் தீவிர திருத்தப் பணியில் அங்கீகரிக்கப்பட்ட அனைத்து அரசியல் கட்சிகளைச் சேர்ந்த 2,44,685 வாக்குச்சாவடி நிலை முகவர்களும் ஈடுபட்டுள்ளனர். தேர்தல் ஆணையத்தின் வழிகாட்டுதலின்படி, 12 அங்கீகரிக்கப்பட்ட அரசியல் கட்சிகளின் ஒவ்வொரு வாக்குச்சாவடி நிலை முகவரும், ஒரு நாளுக்கு அதிகபட்சம் 50 கணக்கீட்டுப் படிவங்களை மட்டுமே உறுதிமொழிப் படிவத்துடன் இணைத்துச் சமர்ப்பிக்க அனுமதிக்கப்பட்டுள்ளார்கள். இந்த ஜனநாயகச் செயல்பாட்டில் வாக்காளர்கள் முழு ஒத்துழைப்பை வழங்குமாறு கேட்டுக் கொள்ளப்படுகிறார்கள்.
முக்கிய காலக்கெடு :
2002 அல்லது 2005 வாக்காளர் பட்டியலில் தங்கள் பெயர் அல்லது உறவினரின் பெயரை கண்டறிய இயலாத நிலையில் உள்ள வாக்காளர்கள், டிசம்பர் 4, 2025-க்குள் பிற விவரங்கள் நிரப்பப்பட்ட கணக்கீட்டுப் படிவத்தை வாக்குச்சாவடி நிலை அலுவலரிடம் ஒப்படைத்தால், அவர்களின் பெயர்கள் வரைவு வாக்காளர் பட்டியலில் இடம்பெறும்.
டிசம்பர் 4, 2025-க்குள் கணக்கீட்டுப் படிவத்தை சமர்ப்பிக்காதவர்களின் பெயர், வரைவு வாக்காளர் பட்டியலில் இடம்பெறாது. மேலும், 3 முறை வீடு தேடிச் சென்றும் கணக்கீட்டுப் படிவத்தை வழங்க முடியாத வாக்காளர்களின் பெயர்களும் வரைவு வாக்காளர் பட்டியலில் இடம்பெறாது.
உரிமைக்கோரல் மற்றும் மறுப்புரை காலம் :
வரைவு வாக்காளர் பட்டியலில் பெயர் இடம்பெறாவிட்டால், வாக்காளர்கள் கவலைப்பட தேவையில்லை. அதற்கான வாய்ப்பு கொடுக்கப்பட்டுள்ளது.
காலம் : டிசம்பர் 9, 2025 முதல் ஜனவரி 8, 2026 வரை.
என்ன செய்யலாம்..? இந்த ஒரு மாத கால அவகாசத்தில், வரைவுப் பட்டியலில் பெயர் இடம்பெறாதவர்கள், படிவம்–6 உடன் உறுதிமொழிப் படிவத்தை இணைத்து, தங்கள் பெயரை புதிதாக சேர்க்க விண்ணப்பிக்கலாம். மேலும், பெயர் நீக்க, அல்லது ஏற்கனவே உள்ள பதிவுக்கு அந்தச் சட்டமன்ற தொகுதியின் வாக்காளர் எதிர்ப்பு தெரிவிக்கலாம்.
இறுதி வாக்காளர் பட்டியல் வெளியீடு :
டிசம்பர் 9, 2025 முதல் ஜனவரி 31, 2026 வரை, வாக்காளரின் தகுதியை ஆய்வு செய்து, தேவையானால் வாக்காளர் பதிவு அலுவலரால் விசாரணை அறிவிப்புகள் வழங்கப்படும். அனைத்து உரிமைக்கோரல்கள் மற்றும் மறுப்புரைகள் பரிசீலிக்கப்பட்ட பிறகு, இறுதி வாக்காளர் பட்டியல் பிப்ரவரி 7, 2026 அன்று வெளியிடப்படும் என்று அறிவிக்கப்பட்டுள்ளது.
Read More : நீங்கள் கொடுத்த SIR படிவத்தின் தற்போதைய நிலை என்ன..? ஆன்லைனில் தெரிந்து கொள்ளலாம்..!!
