தற்போதைய காலகட்டத்தில், பெரும்பாலான மக்கள் தங்கள் பணத்தை சேமிக்கவும், எதிர்கால தேவைகளுக்காக முதலீடு செய்யவும் பாதுகாப்பான மற்றும் நம்பகமான வழிகளை தேடுகின்றனர். அந்த வகையில், மத்திய அரசால் வழங்கப்படும் மிகச் சிறந்த முதலீட்டுத் திட்டங்களில் ஒன்று பொது வருங்கால வைப்பு நிதி (Public Provident Fund – PPF) ஆகும்.
முக்கியச் சலுகைகள் :
அரசாங்கத்தின் உத்தரவாதம், கவர்ச்சிகரமான வரி விலக்கு மற்றும் நிலையான வட்டி விகிதம் ஆகிய 3 முக்கிய அம்சங்களை உள்ளடக்கியிருப்பதால், சிறு மற்றும் நடுத்தர வர்க்க முதலீட்டாளர்களுக்கு PPF ஒரு சிறந்த வாய்ப்பாக உள்ளது. இது ஒரு 15 வருட கால அவகாசம் கொண்ட நீண்ட கால சேமிப்புத் திட்டமாகும்.
இதில் குறைந்தபட்சம் ரூ. 500 முதல் அதிகபட்சம் ரூ. 1.5 லட்சம் வரை ஆண்டுதோறும் முதலீடு செய்யலாம். தற்போது, இத்திட்டத்திற்கு ஆண்டு வட்டி விகிதம் 7.1 சதவீதம் வழங்கப்படுகிறது. மேலும், இந்த திட்டத்தில் முதலீடு செய்யப்படும் தொகை, அதிலிருந்து கிடைக்கும் வட்டி மற்றும் முதிர்வுத் தொகை ஆகிய அனைத்திற்கும் முழு வரி விலக்கு அளிக்கப்படுகிறது.
ரூ.20 லட்சம் இலக்கை அடைவது எப்படி..?
PPF திட்டத்தில் ஒருவர் தொடர்ந்து 15 ஆண்டுகளுக்கு முதலீடு செய்வதன் மூலம், முதிர்வு காலத்தில் ரூ. 20 லட்சம் பெற முடியும். இதற்கு, முதலீட்டாளர்கள் ஒவ்வொரு மாதமும் சுமார் ரூ. 6,250 சேமிக்க வேண்டும். இது ஆண்டுக்கு ரூ. 75,000 ஆகும். 15 ஆண்டுகளில் மொத்தமாக செய்யப்படும் முதலீடு ரூ. 11,25,000 ஆக இருக்கும். இதற்கு 7.1% வட்டி விகிதத்தில் சுமார் ரூ. 8.9 லட்சம் வட்டியாகக் கிடைக்கும். இதன்மூலம், 15 ஆண்டுகள் முடிவில் முதலீட்டாளர் மொத்தமாக ரூ. 20.15 லட்சம் பெற முடியும்.
மேலும், இந்த கணக்கு தொடங்கிய இரண்டாம் ஆண்டுக்குப் பிறகு கடன் பெறும் வசதி உள்ளது. அவசர தேவைக்காக 5 ஆண்டுகளுக்குப் பிறகு, ஒரு குறிப்பிட்ட தொகையை திரும்பப் பெற்றுக்கொள்ளும் வசதியும் இதில் உள்ளது. இது அரசு உத்தரவாதம் அளிக்கும் திட்டம் என்பதால், முதலீட்டிற்கு எந்தவிதமான ஆபத்தும் இல்லை என்று நிதி ஆலோசகர்கள் தெரிவிக்கின்றனர்.
Read More : தங்க நகைகள் சேமிப்பில் அமெரிக்காவையே மிஞ்சும் தமிழ்நாட்டு பெண்கள்..!! மொத்தம் எத்தனை டன்கள் தெரியுமா..?
