மத்திய அரசு, சுற்றுச்சூழலுக்கு தீங்கு விளைவிக்கும் வாகனங்களின் பயன்பாட்டை கட்டுப்படுத்தும் நோக்கில், 20 ஆண்டுகளுக்கு மேல் பழமையான வாகனங்களுக்கான பதிவு சான்றிதழ் (RC) புதுப்பித்தல் கட்டணத்தை தற்போது உயர்த்தியுள்ளது. இது தொடர்பான புதிய நடைமுறைகள் தற்போது அமலுக்கு வந்துள்ளன.
இந்த புதிய கட்டண அமைப்பின்படி, பழைய இருசக்கர வாகனங்களுக்கான பதிவு புதுப்பித்தல் கட்டணம் ரூ.1,000 இருந்து ரூ.2,000 ஆகவும், மூன்று சக்கர வாகனங்களுக்கு ரூ.3,500 இருந்து ரூ.5,000 ஆகவும் உயர்த்தப்பட்டுள்ளது. மேலும், வெளிநாடுகளில் இருந்து இறக்குமதி செய்யப்பட்ட 2 மற்றும் 3 சக்கர வாகனங்களின் பதிவு புதுப்பிப்பு கட்டணம் ரூ.20,000 ஆக நிர்ணயிக்கப்பட்டுள்ளது.
அதேசமயம், இறக்குமதி செய்யப்பட்ட நான்கு சக்கரங்கள் மற்றும் அதற்கு மேற்பட்ட வாகனங்களுக்கு ரூ.80,000 ஆக உயர்த்தப்பட்டுள்ளது. பிஎஸ்-2 மாசு கட்டுப்பாட்டு விதிமுறைகள் நடைமுறைக்கு வருவதற்கு முன்பு தயாரிக்கப்பட்ட வாகனங்கள் அதிகளவு மாசு உமிழ்வதாக கருதப்பட்டு, இவை சுற்றுச்சூழலுக்கு தீங்கு விளைவிப்பதாக மத்திய அரசு அறிவித்துள்ளது.
அதன் அடிப்படையில், பழைய வாகனங்களை நிலையாக பயன்பாட்டில் இருந்து ஒதுக்கும் திட்டத்தின் ஒரு பகுதியாகவே இந்த கட்டண உயர்வுகள் அமல்படுத்தப்பட்டுள்ளன. அதேபோல, கடந்த பிப்ரவரி மாதம் வெளியிடப்பட்ட ஒரு வரைவு அறிக்கையில், 15 ஆண்டுகளுக்கு மேல் பழமையான நடுத்தர மற்றும் கனரக வாகனங்களுக்கான பதிவு புதுப்பித்தல் கட்டணமும் குறிப்பிடத்தக்க வகையில் உயர்த்தப்பட இருப்பதாக தெரிவிக்கப்பட்டது.
நடுத்தர வர்த்தக வாகனங்களுக்கு ரூ.12,000 மற்றும் கனரக வாகனங்களுக்கு ரூ.18,000 கட்டணமாகும். இந்த வாகனங்கள் 20 ஆண்டுகளை கடந்திருந்தால், இந்த கட்டணங்கள் முறையே ரூ.24,000 மற்றும் ரூ.36,000 ஆக மாற்றப்படும் என குறிப்பிடப்பட்டது. மேலும், இலகு ரக வாகனங்களுக்கான பதிவு புதுப்பித்தல் கட்டணமும் ரூ.5,000 இருந்து ரூ.10,000 ஆக உயர்த்தப்பட்டுள்ளது.
மத்திய சாலை போக்குவரத்து மற்றும் நெடுஞ்சாலைகள் துறை வெளியிட்டுள்ள அறிவிப்பில், சுற்றுச்சூழலை பாதுகாக்கும் நோக்குடன் பழைய வாகனங்களைப் பயன்படுத்துவதை தடுக்கும் முயற்சியாகவே இந்த கட்டண மாற்றங்கள் மேற்கொள்ளப்பட்டுள்ளதாகவும் தெரிவிக்கப்பட்டுள்ளது. இந்த நடவடிக்கைகள், காலப்போக்கில் பழமையான மற்றும் அதிக மாசு உமிழும் வாகனங்களை சாலைகளில் இருந்து நீக்குவதற்கான மத்திய அரசின் திட்டத்தின் முக்கிய கட்டமாக கருதப்படுகிறது.
