பெட்ரோல், டீசல் வாகனங்களுக்கு மாற்றாக மின்சார வாகனங்களின் (Electric Vehicles – EV) பயன்பாடு மெதுவாக அதிகரித்து வரும் நிலையில், அதன் உள்கட்டமைப்பை விரைவுபடுத்தும் நோக்கில் தமிழக அரசு முக்கிய உத்தரவை வெளியிட்டுள்ளது. தற்போது தமிழகத்தில் இருக்கும் 1,413 மின்சார வாகன சார்ஜிங் நிலையங்களின் எண்ணிக்கையை அதிகரிக்கவும், அதன் பயன்பாட்டை ஊக்கப்படுத்தவும் அரசு இந்த முடிவை எடுத்துள்ளது.
தமிழக அரசு வெளியிட்டுள்ள புதிய அறிவிப்பின்படி, பெரிய குடியிருப்புகள் மற்றும் வணிக நிறுவனங்கள் தங்கள் வளாகங்களில் மின்சார வாகனங்களுக்கான சார்ஜிங் வசதியை அமைப்பது கட்டாயமாக்கப்பட்டுள்ளது. 8 வீடுகளுக்கு மேலான அல்லது 750 சதுர மீட்டருக்கும் அதிகமான கட்டுமானப் பரப்பளவைக் கொண்ட குடியிருப்புகளில் மின்சார வாகனச் சார்ஜிங் வசதி கட்டாயமாகிறது. மேலும், 50 வீடுகளுக்கு அதிகமான பெரிய குடியிருப்புகள் இருந்தால், வெளியில் இருந்து வருபவர்களுக்கும் சார்ஜிங் வசதி வழங்குவது அவசியம்.
அதேபோல், 300 சதுர மீட்டருக்கும் அதிகமான பரப்பளவில் உள்ள தொழில் நிறுவனங்கள் மற்றும் வணிக வளாகங்களில் இ-சார்ஜிங் வசதி கட்டாயமாக்கப்பட்டுள்ளது. மேலும், இந்த நிறுவனங்கள் தங்கள் மொத்த வாகன நிறுத்துமிடத்தில் குறைந்தது 10 விழுக்காடு இடத்தை மின்சார வாகனங்களுக்காக ஒதுக்க வேண்டும் என்றும் உத்தரவிடப்பட்டுள்ளது. இந்த விதிமுறைகள், 14 மீட்டருக்கும் குறைவான உயரம் கொண்ட அல்லது 8 அல்லது அதற்கும் குறைவான குடியிருப்புகளைக் கொண்ட சிறிய கட்டிடங்களுக்குப் பொருந்தாது.
கொள்கை திருத்தம் :
கடந்த 2023 ஆம் ஆண்டு வெளியிடப்பட்ட தமிழ்நாடு மின்சார வாகன கொள்கை, EV பயன்பாட்டை ஊக்குவிப்பதற்காக கட்டிட சட்டங்களில் திருத்தங்கள் செய்யப்படும் என்று கூறியிருந்தது. அதன்படி, நகரங்களில் உள்ள அனைத்து புதிய கட்டுமானங்கள் மற்றும் அடுக்குமாடிக் குடியிருப்புகளுக்கும், திட்டமிடல் கட்டத்திலேயே சார்ஜிங் உள்கட்டமைப்பு ஒருங்கிணைக்கப்படுவதை உறுதி செய்வதற்காக, இந்தக் கட்டிட மற்றும் கட்டுமான சட்டங்களில் புதிய திருத்தங்கள் கொண்டுவரப்பட்டுள்ளன. அரசின் இந்த நடவடிக்கை, மின் வாகனப் பயன்பாட்டிற்குத் தேவையான உள்கட்டமைப்பை வலுப்படுத்தி, சுற்றுச்சூழலைப் பாதுகாக்கும் முயற்சிகளுக்கு பெரும் உந்துதலை அளிக்கும் என்று எதிர்பார்க்கப்படுகிறது.
Read More : மத்திய அரசின் சோலார் திட்டம் உண்மையிலேயே பயன் தருகிறதா..? மின் கட்டணமே செலுத்த தேவையில்லையா..?
