மழைக்காலம் வந்தாலே, அது தரும் குளுமையுடன் சேர்ந்து, பாக்டீரியா மற்றும் பூஞ்சைகள் பெருகிப் பல்வேறு நோய்த் தொற்றுகள் வளரவும் ஏதுவாகிறது. இந்தச் சமயங்களில், பலரும் எத்தகைய உணவுகளை எடுத்துக்கொள்ள வேண்டும் என்பதில் குழப்பம் அடைகின்றனர். குறிப்பாக, பழைய அல்லது தரமற்ற உணவுப் பொருட்களை வாங்கிச் சமைத்துச் சாப்பிட்டு நோய்வாய்ப்படுவது சகஜம். பருவநிலை மாற்றத்தின்போது பலரும் தவிர்க்க வேண்டிய உணவுப் பட்டியலில், காளான்கள் (Mushroom) முக்கிய இடத்தைப் பெறுகின்றன.
மழைக்காலத்தில் காளான் ஏன் கூடாது..?
காளான்கள் வைட்டமின் டி மற்றும் நோய் எதிர்ப்புச் சக்திக்கு மிகவும் நன்மை பயக்கும் உணவு என்பது உண்மைதான். பலர் அசைவ உணவுகளுக்கு மாற்றாக இதை எடுத்துக் கொள்கிறார்கள். ஆனால், காளான்கள் இயற்கையாகவே ஈரமான மற்றும் அதிக ஈரப்பதம் நிறைந்த சூழலில் செழித்து வளரும் ஒரு பூஞ்சை (Fungus) வகையைச் சேர்ந்தவை. எனவே, மழைக்காலத்தில் காளான்களில் இயல்பைவிட அதிகமான பாக்டீரியாக்கள் மற்றும் கிருமிகள் வளரக்கூடும்.
இதன் காரணமாக, மழைக்காலத்தில் காளான்களை உட்கொள்ளும்போது வயிற்று வலி, வயிற்றுப்போக்கு, அஜீரணம் போன்ற செரிமானப் பிரச்சனைகள் அல்லது ஒவ்வாமை பிரச்சனைகளால் பாதிக்கப்பட வாய்ப்புகள் அதிகம். எனவே, இந்தப் பருவத்தில் காளான்களை முடிந்தவரை தவிர்ப்பது நல்லது.
பிரெஷ் காளான் வாங்குவது எப்படி..?
* காளான்களை சாப்பிட வேண்டும் என்ற கட்டாயம் ஏற்பட்டால், வாங்கும் போது கவனிக்க வேண்டிய முக்கிய அம்சங்களை இப்போது பார்ப்போம்.
* மிகவும் சிறியதாகவோ அல்லது மிக அதிகமாகப் பெரியதாகவோ இருக்கும் காளான்களை தவிர்க்கவும்.
* காளான்களில் அதிகப்படியான அழுக்குகள் அல்லது மண்ணின் ஈரம் இல்லாமல் இருப்பதை உறுதிப்படுத்திக் கொள்ளவும்.
* காளான் தண்டுகளில் இருந்து தொடங்கி, காளான் கருப்பு நிறமாக மாறத் தொடங்கியுள்ளதா என்று சோதிக்கவும். காளான் கறுத்து இருந்தால், அவற்றை வாங்குவதைத் தவிர்த்துவிட வேண்டும்.
தவிர்க்க வேண்டிய மற்ற உணவுகள் :
கீரை : கீரை போன்ற பச்சை இலை காய்கறிகள் நல்ல ஆரோக்கியத்திற்குப் பொதுவாகப் பரிந்துரைக்கப்பட்டாலும், மழைக்காலத்தில் அவற்றைச் சாப்பிடுவது நோய்களை உண்டாக்கலாம். ஏனெனில், மழைக்காலத்தில் இந்தக் காய்கறிகளில் பூச்சிகள் மற்றும் கிருமிகள் அதிகமாக வளர்ந்து, பல்வேறு நோய்களின் அபாயத்தை அதிகரிக்க செய்யும்.
கடல் உணவுகள் : மழைக்காலத்தில் கடல் உணவுகளை உட்கொள்வதும் ஆரோக்கியத்திற்குத் தீங்கு விளைவிக்கும். இந்தக் காலகட்டம் மீன்கள் மற்றும் பிற கடல்வாழ் உயிரினங்களின் இனப்பெருக்கக் காலமாகும். இந்த நேரத்தில் கடல் உணவுகளைச் சாப்பிடுவது பல்வேறு தொற்றுகள் மற்றும் உணவு நச்சால் (Food Poisoning) பாதிக்கப்படும் அபாயத்தை அதிகரிக்கும்.
வறுத்த உணவுகள் : மழைக்காலத்தில் செரிமான அமைப்பு பொதுவாக மெதுவாகவே செயல்படும். இந்தச் சமயத்தில், பக்கோடா, சமோசாக்கள், சிப்ஸ் போன்ற காரமான மற்றும் வறுத்த உணவுகளை அதிகம் சாப்பிடுவது, உடலில் வாயுத்தொல்லை, அமிலத்தன்மை (Acidity) மற்றும் அஜீரணக் கோளாறுகளை ஏற்படுத்தலாம்.
ஆகவே, பருவ கால மாற்றத்தின்போது ஏற்படும் நோய்த்தொற்றுகளைத் தவிர்க்க, இத்தகைய உணவுகளைக் கவனத்துடன் கையாள்வது அல்லது தவிர்ப்பது அவசியம் என்று சுகாதார நிபுணர்கள் பரிந்துரைக்கின்றனர்.
Read More : கைதிகளுக்கு போதைப்பொருள், செல்போன் சப்ளை..!! சேலம் மத்திய சிறை காவலரை தட்டித் தூக்கிய போலீஸ்..!!
