உலகப் புகழ்பெற்ற திருமலை திருப்பதி ஏழுமலையான் கோயிலில் பக்தர்கள் நீண்ட நேரம் வரிசையில் காத்திருக்கும் நிலையை முடிவுக்கு கொண்டு வர, செயற்கை நுண்ணறிவு (AI) மற்றும் தகவல் தொழில்நுட்பத்தை (IT) பயன்படுத்தி புதிய தீர்வுகளை காண உள்ளதாக தேவஸ்தானக் குழுத் தலைவர் பி.ஆர். நாயுடு தெரிவித்துள்ளார்.
சந்திரபாபு நாயுடு தலைமையிலான தெலுங்கு தேசம் கூட்டணி ஆட்சி ஆந்திராவில் அமைந்த பிறகு, புதிய அறங்காவலர் குழுவின் தலைவராக பி.ஆர். நாயுடு நியமிக்கப்பட்டார். இந்தக் குழு அதன் இரண்டாவது ஆண்டில் அடியெடுத்து வைத்துள்ள நிலையில், செய்தியாளர்களை சந்தித்த பி.ஆர். நாயுடு, திருப்பதியில் பக்தர்களின் அனுபவத்தை மேம்படுத்த, தொழில்நுட்பச் சீர்திருத்தங்களில் கவனம் செலுத்த இருப்பதாக கூறினார்.
குறிப்பாக, நீண்ட வரிசைகளை கட்டுப்படுத்துவதற்கும், திருப்பதி யாத்திரையை நிறைவான பயணமாக மாற்றுவதற்கும் ஏஐ மற்றும் தகவல் தொழில்நுட்பம் மூலம் தீர்வுகளை ஏற்படுத்த உள்ளதாக அவர் விளக்கினார். இதன் மூலம், உலகளவில் சனாதன தர்மத்தை பரவலாக்குவதாகவும் தேவஸ்தானம் இலக்கு வைத்துள்ளது.
பக்தர்களின் வசதிக்காகவும், பாதுகாப்புக்காகவும் பல புதிய திட்டங்களையும் தேவஸ்தானம் அறிவித்துள்ளது. தலித் மக்கள் மற்றும் மீனவர்கள் அதிகம் வசிக்கும் பகுதிகளில் 5 ஆயிரம் கோயில்களை கட்டவும் தேவஸ்தானம் திட்டமிட்டுள்ளது. அத்துடன், பக்தர்களுக்குச் சிறந்த வசதிகளை அளிப்பதற்காக ஒரு சைபர் பாதுகாப்புக் கூடத்தை (Cyber Security Lab) அமைக்க உள்ளதாகவும் பி.ஆர். நாயுடு தெரிவித்தார்.
இதற்காக, ஸ்ரீ வெங்கடேஸ்வரா கோவில் கட்டுமான அறக்கட்டளையில் இருந்து ரூ. 2,000 கோடி செலவிடப்பட்டுள்ளது. மேலும், ஸ்ரீ வெங்கடேஸ்வரா நித்ய அன்னதானம் அறக்கட்டளை மூலமாக நாடு முழுவதும் 60-க்கும் அதிகமான கோயில்களில் அன்னதானம் வழங்க ரூ. 2,400 கோடி செலவிடப்பட உள்ளது. கடந்த 11 மாதங்களில் மட்டும் திருப்பதி தேவஸ்தான கோயிலுக்கு ரூ. 918 கோடி உண்டியல் பணம் கிடைத்துள்ளது என்றும் அவர் தெரிவித்தார்.
Read More : தங்க நகைகள் சேமிப்பில் அமெரிக்காவையே மிஞ்சும் தமிழ்நாட்டு பெண்கள்..!! மொத்தம் எத்தனை டன்கள் தெரியுமா..?
