தற்போதைய காலகட்டத்தில், லேப்டாப் என்பது வேலை, கல்வி மற்றும் பொழுதுபோக்கு என பல தேவைகளுக்கான ஓர் அத்தியாவசிய சாதனமாக மாறிவிட்டது. நாம் இவற்றைத் தினமும் பயன்படுத்தும் நிலையில், பெரும்பாலானோர் சந்திக்கும் ஒரு பெரிய சிக்கல் தான் லேப்டாப் அதிக வெப்பமாவது (Overheating). இவ்வாறு ஒரு லேப்டாப் தொடர்ந்து வெப்பமடையும்போது, அதன் உள் பாகங்கள் சேதமடைவது மட்டுமல்லாமல், சில தீவிரச் சூழல்களில் சாதனம் வெடிக்கும் அபாயம் கூட ஏற்பட வாய்ப்புள்ளது. எனவே, லேப்டாப் சூடாவதைத் தடுத்து, அதைப் பாதுகாப்பாகப் பயன்படுத்துவதற்கான வழிமுறைகளை இங்கே பார்க்கலாம்.
போதுமான காற்றோட்டத்தை உறுதி செய்யுங்கள் :
உங்கள் லேப்டாப் அதிக வெப்பமடையாமல் இருக்க, அதற்குப் போதுமான காற்று ஓட்டம் (Airflow) மிக அவசியம். வெப்பத்தை வெளியேற்றுவதற்காக லேப்டாப்பில் உள்ள விசிறி (Fan) சரியாக செயல்பட, சுற்றியுள்ள பகுதியில் போதுமான இடைவெளி இருக்க வேண்டும்.
பெரும்பாலானோர் லேப்டாப்பை மெத்தை, சோபா அல்லது மடி மீது வைத்துக் கொண்டு வேலை செய்வார்கள். இந்தச் சூழலில், லேப்டாப்பின் அடிப்பகுதியில் உள்ள வெப்பக் காற்றை வெளியேற்றும் துளைகள் அடைபட்டுவிடும். இதனால், சூடான காற்று உள்ளேயே தங்கிவிடும்.
எனவே, லேப்டாப்பை எப்போதும் மேசை அல்லது லேப்டாப் கூலிங் பேட் போன்ற சமமான, கடினமான மற்றும் நல்ல காற்றோட்டமுள்ள மேற்பரப்பில் வைத்துப் பயன்படுத்துங்கள்.
தூசியிலிருந்து பாதுகாப்பது அவசியம் :
லேப்டாப் பாதுகாப்பான முறையில் பயன்படுத்தப்பட்டாலும், அதில் தூசி படிவதற்கான வாய்ப்புகள் அதிகம். இந்தத் தூசுகள் லேப்டாப்பின் உள் இருக்கும் ஃபில்டர்கள் மற்றும் விசிறி பிளேடுகளின் மீது படிந்து, அவற்றின் செயல்திறனைக் குறைத்துவிடும்.
விசிறிகள் திறம்படச் செயல்படாதபோது, லேப்டாப் விரைவாகச் சூடாகி, அதிக வெப்பத்திற்கு வழிவகுக்கும். இந்தச் சிக்கலைத் தவிர்க்க, அவ்வப்போது அழுத்தி வெளியேற்றும் காற்றைப் (Compressed Air) பயன்படுத்தி லேப்டாப்பின் துளைகள் மற்றும் விசிறி பகுதிகளைச் சுத்தம் செய்ய வேண்டும். உள் பாகங்களில் தூசி படராமல் இருப்பது லேப்டாப்பின் ஆயுளை நீட்டிக்கும்.
லேப்டாப்பின் சுமையை குறைக்கவும் :
லேப்டாப் சூடாவதற்கு மற்றொரு முக்கியக் காரணம், ஒரே நேரத்தில் அதிகப்படியான சுமையுடன் இயங்குவதுதான். பலர் தங்கள் லேப்டாப்பில் ஒரே நேரத்தில் பல செயலிகள் (Applications) மற்றும் அதிக எண்ணிக்கையிலான இணைய டேப்களைத் (Tabs) திறந்து பயன்படுத்துகின்றனர்.
இவை லேப்டாப்பின் செயலி (Processor) மற்றும் நினைவகத்தின் (RAM) மீது அதிக அழுத்தத்தை ஏற்படுத்துகின்றன. இதனால் லேப்டாப் அதிக இடத்தை எடுத்துக்கொண்டு, அதன் செயல் திறன் வெகுவாகப் பாதிக்கப்பட்டு, வெப்பம் அதிகரிக்கும்.
எனவே, உங்கள் லேப்டாப்பில் உள்ள தேவையற்ற செயலிகள், பெரிய கோப்புகள் (Files) மற்றும் பயன்படுத்தாத மென்பொருட்கள் ஆகியவற்றை நீக்கம் செய்து, ஸ்டோரேஜைக் (Storage) குறைக்கவும். மேலும், ஒரே நேரத்தில் அதிக டேப்களைத் திறப்பதைத் தவிர்ப்பதன் மூலம், எந்தச் சிக்கலும் இல்லாமல் லேப்டாப்பை நீடித்த உழைப்புடன் பயன்படுத்த முடியும்.
