தமிழ்நாட்டில் தொழில்முனைவோரை உருவாக்கும் நோக்கில், தமிழ்நாடு அரசின் தொழில் முனைவோர் மேம்பாடு மற்றும் புத்தாக்க நிறுவனம் சிறுதானிய வகைகளைக் கொண்டு பல்வேறு பேக்கரிப் பொருட்களை தயாரிப்பதற்கான 3 நாள் சிறப்புப் பயிற்சித் திட்டத்தை சென்னையில் நடத்தவிருக்கிறது.
இந்தத் தொழில்முனைவோர் மேம்பாட்டுத் திட்டம், வரும் நவம்பர் 25.11.2025 முதல் 27.11.2025 ஆம் தேதி வரை, காலை 10 மணி முதல் மாலை 5 மணி வரை நடைபெற உள்ளது. தற்போது ஆரோக்கியமான உணவுப் பழக்கம் மக்களிடையே அதிகரித்து வரும் நிலையில், சிறுதானியங்கள் மூலம் பேக்கரிப் பொருட்களை தயாரிக்கும் தொழிலைத் தொடங்க விரும்புவோருக்கு இந்தப் பயிற்சி மிகவும் பயனுள்ளதாக இருக்கும்.
பயிற்சியில் கற்றுத் தரப்படும் பொருட்கள் :
இந்தப் பயிற்சியில், பேக்கரி துறையில் புதிய வரவாக இருக்கும் ஆரோக்கியமான மற்றும் புதுமையான பொருட்கள் தயாரிக்கும் முறைகள் விரிவாகக் கற்றுத் தரப்பட உள்ளன. இதில், கோதுமை வெண்ணெய் பிஸ்கட், தினை பால் பிஸ்கட், ராகி நட்ஸ் குக்கீகள், மல்டிமில்லட் குக்கீகள், சோளம் சாக்லேட் பிஸ்கட், கம்பு நெய் பிஸ்கட், கருப்பு கவுனி பாதாம் குக்கீ, ராகி சாக்லேட் கேக், தினை வாழை கேக், சோளம் கேரட் இலவங்கப்பட்டை கேக், முழு கோதுமை ரொட்டி, மல்டிமில்லட் ரொட்டி உள்ளிட்ட பல்வேறு பிஸ்கட், குக்கீ, கேக் மற்றும் ரொட்டி வகைகள் எப்படி தயாரிப்பது என்பது குறித்த செய்முறை விளக்கங்கள் அளிக்கப்படும். மேலும், தொழில் தொடங்க ஆர்வமுள்ளவர்களுக்கு அரசு வழங்கும் உதவிகள், கடனுதவிகள் மற்றும் மானியங்கள் பற்றிய விவரங்களும் விளக்கப்பட உள்ளன.
யார் விண்ணப்பிக்கலாம்..?
இந்தப் பயிற்சியில் சேர ஆர்வமுள்ள தொழில்முனைவோர்கள் (ஆண்/பெண்), 18 வயதுக்கு மேற்பட்டவராகவும், குறைந்தபட்சம் 10 ஆம் வகுப்பு வரை கல்வித் தகுதி பெற்றவராகவும் இருக்க வேண்டும். பயிற்சியில் பங்கேற்கும் பயனாளிகளுக்குக் குறைந்த வாடகையில் தங்கும் விடுதி வசதியும் செய்து தரப்பட்டுள்ளது. பயிற்சி நிறைவில், பங்கேற்பவர்களுக்கு அரசுச் சான்றிதழும் வழங்கப்படும் என்பதால், ஆர்வமுள்ளவர்கள் முன்கூட்டியே முன்பதிவு செய்வது அவசியம்.
கூடுதல் விவரங்கள் மற்றும் முன்பதிவுக்கு, www.editn.in என்ற இணையதளத்தை அணுகலாம். மேலும், அலுவலக வேலை நாட்களில் (திங்கள் முதல் வெள்ளி வரை) காலை 10 மணி முதல் மாலை 5.45 மணி வரை, சென்னை ஈக்காட்டுத்தாங்கலில் உள்ள தமிழ்நாடு தொழில் முனைவோர் மேம்பாடு மற்றும் புத்தாக்க நிறுவனத்தின் அலுவலகத்தை அல்லது 8668102600 / 99436 85468 என்ற கைபேசி எண்களைத் தொடர்புகொண்டு விவரங்களைப் பெறலாம்.
