உலகம் முழுவதும் அதிக உயிரிழப்புகளுக்கு முக்கியக் காரணங்களில் ஒன்றாகப் புகைபிடித்தல் உள்ளது. உலக சுகாதார அமைப்பு (WHO) கூற்றுப்படி, ஆண்டுதோறும் 8 மில்லியனுக்கும் அதிகமானோர் புகைபிடித்தலால் இறக்கின்றனர். இந்தியாவில் மட்டும் ஆண்டுக்கு 1.35 மில்லியன் இறப்புகளுக்குப் புகைபிடித்தல் காரணமாகிறது.
புற்றுநோய், இதய நோய், பக்கவாதம் போன்ற பல கடுமையான உடல்நலக் குறைவுகளுக்கு இது வழிவகுக்கிறது. இந்த நிலையில், சிகரெட் பிடிக்கும் எண்ணிக்கையைக் குறைப்பது மட்டும் போதுமானதல்ல; முழுமையாக நிறுத்துவதுதான் இதய ஆரோக்கியத்தைப் பாதுகாக்கும் என்று ஓர் ஆய்வு எச்சரித்துள்ளது.
குறைவாக புகைப்பதும் ஆபத்து தான் :
பல ஆண்டுகளாகவே, புகைபிடிப்பதால் ஏற்படும் தீமைகள் மற்றும் அதை நிறுத்துவதால் கிடைக்கும் நன்மைகள் குறித்து ஆய்வுகள் நடைபெற்று வருகின்றன. சமீபத்தில் ‘PLOS Medicine’ இதழில் வெளியான புதிய ஆய்வு, புகைபிடிக்கும் அளவு மற்றும் நிறுத்துவது ஒரு நபரின் இதயம் மற்றும் ஒட்டுமொத்த உடல்நலனை எவ்வாறு பாதிக்கிறது என்பதைத் தெளிவுபடுத்தியுள்ளது.
பொதுவாக, ஒருவர் ஒரு நாளைக்குப் புகைக்கும் சிகரெட்டுகளின் எண்ணிக்கையைக் குறைத்தால், உடல்நலத்திற்கு நன்மை கிடைக்கும் என்ற நம்பிக்கை பரவலாக உள்ளது. ஆனால், இந்த ஆய்வின் முடிவு அந்த நம்பிக்கையை உடைத்துள்ளது.
ஆய்வு முறை : ஆராய்ச்சியாளர்கள், 22 நீண்டகால ஆய்வுகளில் இருந்து (3.23 லட்சம் பேர் பங்கேற்றது) தரவுகளைப் பகுப்பாய்வு செய்தனர்.
ஆபத்து அதிகரிப்பு : ஆய்வில், புகைபிடிக்காதவர்களுடன் ஒப்பிடும்போது, தினமும் புகைப்பவர்கள் அனைவரும் இதய நோய்களுக்கு அதிக ஆபத்தில் இருப்பது உறுதி செய்யப்பட்டது. புகைபிடிக்கும் ஆண்களுக்கு 74% வரையிலும், பெண்களுக்கு 200% வரையிலும் அதிக இதய நோய் ஆபத்து இருப்பது கண்டறியப்பட்டது.
ஒரு சிகரெட் கூட பேராபத்து : குறைவாகப் புகைப்பது பாதுகாப்பு என்ற எண்ணம் பலரிடம் இருந்தாலும், இந்த ஆய்வு ஒரு முக்கிய உண்மையை வெளிப்படுத்தியுள்ளது: தினமும் ஒரு சிகரெட் அல்லது அதைவிடக் குறைவாகப் புகைப்பவர்களுக்குக் கூட, இதய நோய் அபாயம் குறிப்பிடத்தக்க அளவில் உயர்ந்திருந்தது.
தினமும் 2 முதல் 5 சிகரெட் : இதயச் செயலிழப்பு 57% அதிகமாகவும், இதயத்தால் ஏற்படும் இறப்பு 57% உயர்வும், மற்ற அனைத்துக் காரணங்களாலும் ஏற்படும் ஒட்டுமொத்த இறப்பு 60% அதிகமாகவும் காணப்பட்டது.
தினமும் 11 முதல் 15 சிகரெட்டுகள் : இதய மற்றும் இரத்தக்குழாய் (CVD) ஆபத்து 87% வரையிலும், ஒட்டுமொத்த இறப்பு 130% வரையிலும் அதிகரித்திருந்தது.
இந்த தரவுகளின் மூலம், “குறைவாகப் புகைப்பது ஒன்றும் பாதுகாப்பானது அல்ல” என்றும், எவ்வளவு குறைவாகப் புகைத்தாலும் இதயத்திற்கும் உடலுக்கும் பெரிய பாதிப்பையே ஏற்படுத்தும் என்றும் ஆராய்ச்சியாளர்கள் உறுதியாகத் தெரிவித்துள்ளனர்.
புகைபிடிப்பதை நிறுத்துவதே நிரந்தர தீர்வு :
புகைபிடித்தலை நிறுத்துவதால்தான் உண்மையான நன்மைகள் கிடைக்கின்றன என்பதையும் இந்த ஆய்வு மீண்டும் வலியுறுத்தியுள்ளது.
உடனடி நன்மை : புகைபிடிப்பதை நிறுத்திய உடனேயே, உடல் பல நன்மைகளை அனுபவிக்கத் தொடங்குகிறது.
ஆபத்து குறைப்பு : ஒரு நபர் புகைபிடிப்பதை நிறுத்திய முதல் 3 ஆண்டுகளுக்குள்ளாகவே, இறப்பு ஆபத்து 90% முதல் 95% வரை குறைகிறது.
நீண்ட காலப் பாதுகாப்பு : 20 ஆண்டுகளுக்குப் பிறகு, முன்பு புகைபிடித்தவர்களின் இதய நோய் ஆபத்து, தொடர்ந்து புகைபிடிப்பவர்களை விட சுமார் 80% குறைவாக இருந்தது கண்டறியப்பட்டுள்ளது.
எனவே, சிகரெட்டுகளின் எண்ணிக்கையைச் சிறிது குறைப்பது தீர்வு அல்ல. முழுமையாகப் புகைபிடிப்பதை நிறுத்துவதுதான் இதயத்தைப் பாதுகாத்து, ஆரோக்கியமான ஆயுட்காலத்தை உறுதிசெய்யும் ஒரே பயனுள்ள வழியாகும் என்று ஆய்வாளர்கள் வலியுறுத்துகின்றனர்.
Read More : உங்கள் லேப்டாப் அடிக்கடி ஹீட் ஆகுதா..? வெடிக்கும் அபாயம்..!! உடனே இதை பண்ணுங்க..!!
