உலக சுகாதார அமைப்பு (WHO) வெளியிட்ட கணக்கின்படி, 2020 ஆம் ஆண்டில் மட்டும் உலக அளவில் சுமார் 1 கோடி பேர் புற்றுநோயால் உயிரிழந்துள்ளனர். மரணத்திற்கான முக்கிய காரணிகளில் ஒன்றாகப் புற்றுநோய் விளங்கும் இந்த அபாயகரமான சூழலில், அந்த நோயைத் தடுக்க ஒரு உணவு உதவுகிறது என்றால், அது நிச்சயமாக தவிர்க்க முடியாத ஒன்றுதான். அப்படி ஒரு மிகச்சிறந்த உணவு குறித்து சென்னையைச் சேர்ந்த மருத்துவர் ரம்யா தனது சமூக வலைதளம் மூலமாக பகிர்ந்துள்ளார்.
புற்றுநோயை தடுக்கும் கருப்பு கவுனி அரிசி :
கருப்பு கவுனி அரிசி, இயற்கையாகவே ப்ரௌனிஷ் பர்ப்பிள் நிறத்தில் இருக்கும். இந்த சிறப்பான நிறத்திற்குக் காரணம், அதில் அடங்கியுள்ள ஆன்தோசயனைன் (Anthocyanin) எனப்படும் சக்திவாய்ந்த ஆண்டி-ஆக்ஸிடண்ட் ஆகும். இந்த ஆன்தோசயனைன்-க்கு, புற்றுநோயைத் தடுக்கும் திறன் இருப்பதாக நிரூபிக்கப்பட்டுள்ளது. இந்த அரிசி உணவைத் தொடர்ந்து உட்கொண்டு வருவது, ஒட்டுமொத்தமாகப் புற்றுநோய் தடுப்புக்கு உதவும் என மருத்துவர் ரம்யா வலியுறுத்துகிறார்.
உடல் எடை குறையும் :
கருப்பு கவுனி அரிசி, ரத்த சர்க்கரை அளவைக் கட்டுப்படுத்துவதற்கும், உடல் எடை குறைப்பிற்கும் உதவுகிறது. இதற்குக் காரணம், இதில் கிளைசமிக் இண்டெக்ஸ் (Glycemic Index) குறைவாக உள்ளதுதான். குறைவான கிளைசமிக் இண்டெக்ஸ் காரணமாக, இது இன்சுலின் சுரப்பு அதிகரிப்பதைத் தடுக்கிறது. அதே நேரத்தில், இதில் நார்ச்சத்து (Fiber) அதிகம் இருப்பதால், உடலுக்குத் தேவையான ஊட்டச்சத்து கிடைப்பது உறுதி செய்யப்படுகிறது.
இளமையான சருமம் :
இந்தப் பாரம்பரிய அரிசியில், சருமம் சுருங்குவதைத் தாமதப்படுத்தும் சிறப்பான தன்மையும் இருக்கிறது. இது சருமப் பாதுகாப்பை உறுதிசெய்வதுடன், வயதான தோற்றத்தைத் தவிர்த்து, ஒருவருக்கு இளமையான பொலிவைத் தருகிறது. ஒட்டுமொத்தமாக உடல் ஆரோக்கியத்தை மேம்படுத்துவதிலும் இது முக்கியப் பங்கு வகிக்கிறது.
ஊட்டச்சத்து குறையாமல் சமைக்கும் முறை :
கருப்பு கவுனி அரிசியை சமைக்கும்போது, அதன் சில ஊட்டச்சத்துகள் போய்விடுவதாகப் பலர் அஞ்சுகின்றனர். இந்த அச்சத்தைப் போக்க, மருத்துவர் ரம்யா ஒரு எளிய சமையல் குறிப்பை வழங்கியுள்ளார். அதாவது இரவு முழுவதும் (சுமார் 12 மணி நேரம் வரை) இந்த அரிசியை ஊறவைத்து, பின்னர் அளவான தண்ணீரைப் பயன்படுத்திக் கஞ்சி அல்லது சாதம் போல வடித்துச் சாப்பிடுவது சிறந்தது. இதன் மூலம், அதன் ஊட்டச்சத்துக்கள் அதிக அளவில் உடலுக்குக் கிடைக்கும் என்றும் அவர் தெரிவித்துள்ளார்.
பொறுப்புத் துறப்பு : மேற்கண்ட விவரங்கள் அனைத்தும் மருத்துவ நிபுணரின் தனிப்பட்ட கருத்துக்களாகும். இவற்றின் உண்மைத் தன்மையை Tamil Xpress இணையதளம் உறுதிப்படுத்தவில்லை.
