பாட்டாளி மக்கள் கட்சியின் தலைமைப் பதவி யாருக்கு என்பதில் கடந்த சில மாதங்களாக நீடித்து வந்த குழப்பங்களுக்கு, இந்தியத் தேர்தல் ஆணையம் முற்றுப்புள்ளி வைத்தது. கட்சியின் தலைவராக அன்புமணி ராமதாஸ் தான் என்று தேர்தல் ஆணையம் அதிகாரப்பூர்வமாக அறிவித்துள்ளது. இதன் மூலம், அன்புமணிக்கு எதிரான நிலைப்பாட்டில் கட்சி நிறுவனர் ராமதாஸ் அளித்த மனுவை ஆணையம் நிராகரித்துள்ளது.
தேர்தல் ஆணையத்தின் இந்த அறிவிப்பால் கொதிப்படைந்த பா.ம.க.வின் கௌரவ தலைவர் ஜி.கே.மணி, “தேர்தல் ஆணையம் செய்தது ஜனநாயகப் படுகொலை” என்று விமர்சித்துள்ளார். மேலும், இந்த முடிவுக்கு எதிர்ப்பு தெரிவித்து டெல்லியில் பா.ம.க. சார்பில் ஒரு பெரிய போராட்டத்தை நடத்தப் போவதாகவும் அவர் அறிவித்துள்ளார்.
இந்தச் சூழலில், தனது உரிமையை ஒருபோதும் விட்டுக் கொடுக்க முடியாது என்று கட்சி நிறுவனர் ராமதாஸ் திட்டவட்டமாக தெரிவித்துள்ளார். கட்சி நிர்வாகிகள் மத்தியில் பேசிய அவர், அன்புமணி ராமதாஸ் மீது சரமாரியான குற்றச்சாட்டுகளை முன்வைத்துள்ளார்.
அன்புமணியின் பா.ம.க. தலைவர் பதவிக் காலம் ஏற்கனவே முடிவடைந்துவிட்டது என்று ராமதாஸ் கூறியுள்ளார். தேர்தல் ஆணையத்தை அன்புமணி பணம் கொடுத்து விலை வாங்கிவிட்டார் என்றும் அவர் பகிரங்கமாக குற்றம் சாட்டியுள்ளார்.
நான் உருவாக்கிய கட்சியில் என்னுடைய உரிமையை ஒருபோதும் விட்டுக்கொடுக்க மாட்டேன் என்றும் எனது உரிமையை யாராலும் திருட முடியாது. இனி வெல்லப்போவது ராமதாஸ் தான் என்றும் அவர் கூறியுள்ளார். மேலும், துரோகம் செய்த அன்புமணி, ஒருபோதும் அரசியலில் இனி வெற்றியே பெற முடியாது என்று சாபம் விட்டுள்ளார். கடந்த சட்டமன்றத் தேர்தலில் பா.ம.க.வின் பிரதிநிதித்துவம் குறைந்ததற்கு, அன்புமணியின் செயல்பாடுகள்தான் காரணம் என்றும் அவர் குற்றம் சாட்டியுள்ளார்.
தான் உழைத்து உருவாக்கிய கட்சியை அன்புமணி அபகரிக்க முயற்சி செய்வதாகவும், கட்சி விவகாரம் தொடர்பாக அன்புமணி கூறுவது அனைத்தும் பொய்தான் என்றும் அவர் மிகக் கடுமையாக விமர்சித்துள்ளார். அன்புமணி தன்னுடைய கூட்டங்களுக்குப் பணம் கொடுத்துதான் மக்களைக் கூட்ட முடியும் என்றும் அவர் கூறியுள்ளார்.
Read More : பக்கா ஸ்கெட்ச் போட்ட அமித்ஷா..!! செங்கோட்டையனை தவெகவில் இணைய சொன்னதே அவர் தான்..!! பரபரப்பு தகவல்..!!
