பாமக சேலம் மேற்கு தொகுதி சட்டமன்ற உறுப்பினரான அருள், சமீபத்தில் தன் கார் மீது நடந்த தாக்குதல் சம்பவத்திற்கு பாமக தலைவர் அன்புமணி ராமதாஸ் தான் காரணம் என்று வெளிப்படையாக குற்றம்சாட்டியுள்ளார். தன்னை கொலை செய்ய வேண்டும் என்பதே அன்புமணியின் ஆசையாக உள்ளது என்று கூறியுள்ள அருள், இந்த வழக்கில் அன்புமணியை முதல் குற்றவாளியாக சேர்க்க வேண்டும் என்றும் வலியுறுத்தியுள்ளார்.
ராமதாஸின் தீவிர ஆதரவாளராக அறியப்படும் அருள், இவருக்கும் அன்புமணி ஆதரவாளர்களுக்கும் சேலம் பகுதியில் நீண்டகாலமாக மோதல் நிலவி வருவதாக தெரிகிறது. இந்த மோதலின் தொடர்ச்சியாக, அருளின் தொலைபேசிக்கு கொலை மிரட்டல்களும், ஆபாச வார்த்தைகளால் வசைபாடும் செயல்களும் தொடர்ந்து வந்துள்ளதாக கூறப்படுகிறது. தன் உயிருக்கு அச்சுறுத்தல் இருப்பதாகக் கூறி, ஏற்கனவே அவர் காவல் நிலையத்தில் புகார் மனு அளித்துள்ளார்.
சமீபத்தில், வாழப்பாடியில் உள்ள கட்சியின் நிர்வாகி இல்லத்தில் நடந்த இறுதிச் சடங்கில் பங்கேற்று விட்டு எம்.எல்.ஏ. அருள் தனது கார் மூலம் வீடு திரும்பிக் கொண்டிருந்தபோது, மர்ம நபர்கள் அவரது கார் மீது கல்வீசி தாக்குதல் நடத்தினர். இதனைத் தொடர்ந்து, அருள் உடன் சென்ற ஆதரவாளர்களும் பதிலுக்குக் கல்வீச்சில் ஈடுபட்டனர்.
பின்னர், இரு தரப்பினரும் உருட்டுக் கட்டைகளால் மாறி மாறித் தாக்கிக் கொண்டதால், எம்.எல்.ஏ. அருளின் கார் சேதமடைந்தது. காருக்குள்ளே இருந்த அருளை, அவரது ஆதரவாளர்கள் சிரமப்பட்டு காத்த நிலையில், தாக்குதல் நடத்திய கும்பல் அங்கிருந்து தப்பியோடியது.
தாக்குதலின்போது, அந்தக் கும்பல் ‘அன்புமணி வாழ்க’ என்று கோஷமிட்டு தாக்கியதாக எம்.எல்.ஏ. அருள் குற்றம் சாட்டினார். இந்த மோதல் சம்பவம் தொடர்பாக இரு தரப்பினரும் போலீஸில் புகார் அளித்த நிலையில், அன்புமணி ஆதரவாளர்கள் 6 பேர் கைது செய்யப்பட்டனர். மோதல் சம்பவம் தொடர்பாக எம்.எல்.ஏ. அருள் உட்பட 40 பேர் மீது காவல்துறையினர் வழக்குப் பதிவு செய்துள்ளனர்.
இந்தச் சூழலில், செய்தியாளர்களை சந்தித்த பாமக எம்.எல்.ஏ. அருள், “இந்தக் கொலைவெறி தாக்குதலுக்கு மூல காரணம் அன்புமணிதான். அவர் தான் இவர்களை தூண்டி விட்டுள்ளார். அவர்தான் இந்த வழக்கில் முதல் குற்றவாளி. கைது செய்யப்பட்டவர்களின் செல்போன்களை சோதனை செய்தால், அவர்களுடன் அன்புமணியும் அவரது உதவியாளர்களும் பேசித் தூண்டி விட்ட ஆதாரங்கள் கிடைக்கும். என்னை கொல்ல வேண்டும் என்பதுதான் அன்புமணியின் நோக்கம். உடனே அவரை கைது செய்ய வேண்டும்” என்று வலியுறுத்தியுள்ளார்.
Read More : தங்க நகைகள் சேமிப்பில் அமெரிக்காவையே மிஞ்சும் தமிழ்நாட்டு பெண்கள்..!! மொத்தம் எத்தனை டன்கள் தெரியுமா..?
