தமிழ்நாட்டில் 2025-26ஆம் ஆண்டுக்கான பிரதம மந்திரி பயிர் காப்பீட்டுத் திட்டம் (PMFBY), குறுவை, சம்பா மற்றும் தாளடி (நவரை) பருவங்களில் தீவிரமாக செயல்படுத்தப்பட்டு வருகிறது. இந்தக் காப்பீட்டுத் திட்டத்தில் பதிவு செய்ய நிர்ணயிக்கப்பட்டிருந்த காலக்கெடு முடிவடையும் நிலையில், இதுவரை காப்பீடு செய்யாத விவசாயிகள் உரிய ஆவணங்களுடன் வரும் டிசம்பர் 1ஆம் தேதிக்குள் கட்டாயம் பதிவு செய்து பயனடையுமாறு வேளாண்மை மற்றும் உழவர் நலத்துறை அமைச்சர் எம்.ஆர்.கே. பன்னீர்செல்வம் முக்கிய அறிவிப்பை வெளியிட்டுள்ளார்.
கால அவகாச நீட்டிப்பு ஏன்?
சம்பா மற்றும் தாளடி (நவரை) பருவப் பயிர்களைக் காப்பீடு செய்வதற்கு தேசிய பயிர்க் காப்பீட்டு வலைத்தளத்தில் (NCIP) செப்டம்பர் மாதம் முதல் நவம்பர் மாதம் வரை கால நிர்ணயம் செய்யப்பட்டிருந்தது. ஆனால், பல விவசாயிகள் பதிவு செய்ய முடியாமல் போனதைக் கருத்தில் கொண்டு, தமிழ்நாடு அரசின் வேண்டுகோளை ஏற்று மத்திய அரசு கால அவகாசத்தை நீட்டித்துள்ளது.
மேலும், கடந்த குறுவைப் பருவத்தில், தமிழக அரசு கேட்டதற்கிணங்க, இத்திட்டத்தில் பதிவு செய்ய விவசாயப் பதிவு மூலம் வழங்கப்படும் விவசாயிகள் அடையாள எண் கட்டாயம் என்பதில் இருந்து மத்திய அரசு விலக்கு அளித்தது குறிப்பிடத்தக்கது.
தற்போதைய சூழலில், பயிர்க் காப்பீடு செய்ய அவகாசம் நீட்டிக்கப்பட்டுள்ள நிலையில், உரிய ஆவணங்களுடன் விவசாயிகள் டிசம்பர் 1ஆம் தேதிக்குள் தவறாமல் பதிவு செய்ய வேண்டும் என்று அமைச்சர் எம்.ஆர்.கே. பன்னீர்செல்வம் கேட்டுக் கொண்டுள்ளார். இயற்கைச் சீற்றங்களால் ஏற்படும் இழப்புகளில் இருந்து பயிர்களைக் காத்துக்கொள்ள உதவும் இந்த இறுதி வாய்ப்பை விவசாயிகள் தவறவிடக் கூடாது என்றும் அவர் அறிவுறுத்தியுள்ளார்.
Read More : உங்கள் லேப்டாப் அடிக்கடி ஹீட் ஆகுதா..? வெடிக்கும் அபாயம்..!! உடனே இதை பண்ணுங்க..!!
