கிருஷ்ணகிரி மாவட்டம் சூளகிரியைச் சேர்ந்த திமுக உறுப்பினரும், ரியல் எஸ்டேட் தொழிலதிபருமான சீதாராமன் (34) என்பவரை கடத்திப் பணம் பறிக்க முயன்ற சம்பவம் அப்பகுதியில் பெரும் பரபரப்பை ஏற்படுத்தியுள்ளது.
கடந்த வெள்ளிக்கிழமை இரவு சுமார் 7 மணியளவில் ஒரு பெண், சீதாராமனுக்குத் தொலைபேசி மூலம் அழைப்பு விடுத்துள்ளார். “வீட்டு மனை வாங்க வேண்டும், நிலம் தொடர்பாகப் பேச வேண்டும்” என்று அந்தப் பெண் ஆசை வார்த்தைகள் பேசியுள்ளார். இதனை உண்மை என்று நம்பிய சீதாராமன், உடனடியாக தனது காரில் சூளகிரியில் இருந்து, ஓசூர் அருகே உள்ள பத்தளப்பள்ளிக்குப் புறப்பட்டுச் சென்றுள்ளார்.
பத்தளப்பள்ளிக்கு வந்த சீதாராமனை, அந்தப் பெண் தனது வீடு பக்கத்தில் உள்ளதாகவும், அங்கு வந்து விரிவாக பேசலாம் என்றும் கூறி அழைத்துச் சென்றுள்ளார். அந்த வீட்டிற்குச் சென்றபோதுதான் அவருக்கு அதிர்ச்சி காத்திருந்தது; அங்கே 7 பேர் கொண்ட மர்ம கும்பல் காத்திருந்தது.
ரூ.5 கோடி மிரட்டல் :
அந்த கும்பல் உடனடியாக சீதாராமனை ஒரு அறையில் கட்டி வைத்து, கொடுமையாகத் தாக்கி மிரட்டியுள்ளது. அவரிடம் இருந்து ரூ.5 கோடி பணம் கேட்டு இரவு முதல் அதிகாலை வரை அந்த கும்பல் மிரட்டல் விடுத்திருக்கிறது. தாக்குதலால் பயந்து நடுங்கியது போல் நடித்த சீதாராமன், ஒரு கட்டத்தில் தன் நண்பர்களிடம் பேசிப் பணத்தைக் கொண்டுவரச் சொல்லி வற்புறுத்துமாறு கடத்தல்காரர்களிடம் கேட்டுள்ளார்.
இதனை நம்பிய கடத்தல் கும்பல், சீதாராமனிடம் அவரது செல்போனை கொடுத்துள்ளனர். உடனே சுதாரித்துக் கொண்ட சீதாராமன், தனது நண்பர் லட்சுமிபதிக்கு தொலைபேசியில் அழைத்துள்ளார். அப்போது கடத்தல்காரர்களுக்கு தெரியாமல், அவர் இருக்கும் இடத்தின் நேரடி லொகேஷனை உடனடியாக நண்பருக்கு பகிர்ந்துள்ளார்.
நண்பர் லட்சுமிபதியும் அந்த லொகேஷனை சீதாராமனின் குடும்பத்தினருக்கு அனுப்பி, கடத்தல் விவரத்தை தெரிவித்துள்ளார். இதனால், அதிர்ச்சியடைந்த குடும்பத்தினர், உடனடியாக மாவட்ட காவல்துறை கண்காணிப்பாளர் தங்கதுரைக்கு தகவல் அளித்தனர். எஸ்பியின் உத்தரவின் பேரில், ஓசூர் உட்கோட்ட போலீசார் உடனடியாக உஷார்படுத்தப்பட்டனர்.
விரட்டிப் பிடித்த போலீஸ் :
இதையடுத்து, போலீசார் தங்களைத் தேடுவதை அறிந்த கடத்தல் கும்பல், சீதாராமனை அவரது காரிலேயே வைத்து வேறு பகுதிக்குக் கடத்திச் செல்ல முயன்றனர். காரில் தப்பிச் செல்ல முயன்ற கடத்தல் கும்பலை போலீசார் சினிமா பாணியில் விரட்டிக் கொண்டு சென்றனர். இறுதியாக, நாலாபுறமும் சுற்றி வளைத்து அந்தக் காரை மடக்கிப் பிடித்தனர்.
காரில் இருந்த சங்கர் (38), சுரேஷ் (40), அஜய் (19), கோகுலகண்ணன் (23) ஆகிய நான்கு பேரையும் மடக்கிப் பிடித்த போலீசார், சீதாராமனைச் சற்றும் காயம் இல்லாமல் பத்திரமாக மீட்டனர். கடத்தலுக்குப் பயன்படுத்திய இரண்டு கத்திகளும் பறிமுதல் செய்யப்பட்டன. கைது செய்யப்பட்ட 4 பேரும் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டனர். இந்த வழக்கில் தொடர்புடைய ஸ்வேதா என்ற பெண் உட்பட மற்ற 4 பேரை போலீசார் தீவிரமாக தேடி வருகின்றனர்.
Read More : திருவண்ணாமலை கார்த்திகை தீப திருவிழா..!! கொடியேற்றத்துடன் தொடங்கியது..!!
