வேலை தேடும் இளைஞர்கள் மத்தியில் பெருகி வரும் சவால்களை சமாளிக்கும் வகையில், தமிழக அரசு ஒரு முன்னோடித் திட்டத்தை அறிமுகப்படுத்தியுள்ளது. குறிப்பாக, கிராமப்புற இளைஞர்கள் மத்தியில் காணப்படும் வேலைவாய்ப்பின்மை பிரச்சனைக்கு தீர்வு காணும் விதமாக, ‘முதல்வரின் உழவர் நல சேவை மைய திட்டம் 2025-2026’ தொடங்கப்பட்டுள்ளது.
இந்தத் திட்டத்தின் மூலம், வேளாண் துறையில் படித்த இளைஞர்கள், மற்றவர்களை சார்ந்திராமல், சொந்தமாக தொழில் தொடங்கி, மற்றவர்களுக்கும் வேலை வழங்க முடியும். இந்தத் திட்டம் கரூர் மாவட்டம் உட்படப் பல பகுதிகளில் செயல்படுத்தப்பட உள்ளது.
மானியம் :
வேளாண்மை, தோட்டக்கலை அல்லது வேளாண் பொறியியல் சார்ந்த பட்டப்படிப்பு அல்லது பட்டயப்படிப்பை முடித்த இளைஞர்களை இலக்காக கொண்டு இத்திட்டம் வடிவமைக்கப்பட்டுள்ளது. இந்தச் சேவை மையங்கள் மூலம், விவசாயிகள் தங்கள் விளைச்சலை அதிகரிக்கத் தேவையான தரமான விதைகள், உரங்கள், பூச்சிக்கொல்லி மருந்துகள் ஆகியவற்றை நேரடியாகப் பெறலாம்.
அத்துடன், பயிர்களில் ஏற்படும் நோய்கள் அல்லது விளைச்சல் குறைபாடுகளைச் சரி செய்ய, உயரிய தொழில்நுட்ப ஆலோசனைகள் வழங்கப்படும். மேலும், வேளாண் விளைபொருட்களை மதிப்புக்கூட்டி விற்பனை செய்வதற்கான பயிற்சிகளும் இங்கு அளிக்கப்படும்.
இந்த மையங்களை தொடங்க ஆகும் மொத்தச் செலவான ரூ.10 லட்சம் முதல் ரூ.20 லட்சம் வரையிலான முதலீட்டுத் தொகையில், அரசு 30 சதவீதம் வரை மானியம் வழங்குகிறது. அதாவது, 300 சதுர அடியில் மையம் அமைக்கும் இளைஞர்களுக்கு ரூ.3 லட்சம் மானியம் வழங்கப்படும்.
அதேபோல், 600 சதுர அடியில் மையம் அமைக்கும் இளைஞர்களுக்கு அதிகபட்சமாக ரூ.6 லட்சம் மானியமாக வழங்கப்படும். இந்த மானியம், கிராமப்புற இளைஞர்களின் தொழில் கனவுக்குப் பெரும் ஊக்கமளிக்கும் என்று நம்பப்படுகிறது.
தகுதிகள் என்ன..?
* வேளாண்மை, தோட்டக்கலை, வேளாண் பொறியியல் அல்லது அது தொடர்பான துறைகளில் பட்டப்படிப்பு அல்லது பட்டயப்படிப்பு முடித்திருக்க வேண்டும்.
* அரசு அல்லது அரசு சார்ந்த நிறுவனங்களில் பணியில் இருப்பவர்கள் இத்திட்டத்தில் சேர முடியாது.
* ஆர்வமுள்ள இளைஞர்கள் முதலில், தங்கள் தொழில் திட்டம் குறித்த விரிவான அறிக்கையைத் தயாரித்து, உரிய வங்கிகளில் கடனுக்கு விண்ணப்பிக்க வேண்டும்.
விண்ணப்பிப்பது எப்படி..?
வங்கிக் கடன் ஒப்புதல் கிடைத்த பிறகு, தமிழக அரசின் அதிகாரப்பூர்வ இணையதளமான www.msmeonline.tn.gov.in என்ற தளத்தின் மூலம் தேவையான ஆவணங்களைப் பதிவேற்றம் செய்து, மானிய உதவியைப் பெற விண்ணப்பிக்கலாம். விதை, உரம் போன்ற விற்பனை உரிமங்களை பெறாதவர்களும், அதே இணையதளத்தில் அதற்கான விண்ணப்பங்களைப் பூர்த்தி செய்து அனுப்பலாம்.
