சமீபகாலமாக, பெண்கள் சுயதொழிலில் அதிக கவனம் செலுத்த தொடங்கியுள்ளனர். குடும்ப பொறுப்புகள் மற்றும் வேலை அல்லது வணிகம் இரண்டையும் திறம்பட சமன் செய்யும் ஆற்றல் பெண்களிடம் அதிகம் உள்ளது மறுக்க முடியாத உண்மை. இன்றைய காலகட்டத்தில், பல பெண்கள் வீட்டில் இருந்தபடியே சின்ன சின்ன வணிகங்களை தொடங்கி, தங்கள் பொருளாதார தேவையை பூர்த்தி செய்து வருகின்றனர். முன்பு நம் அம்மாக்கள் புடவை விற்பது, பலகாரம் தயாரிப்பது, பூ கட்டுவது போன்ற சிறு தொழில்களை செய்த நிலையில், இப்போது அதே வணிகங்கள் ஆன்லைன் விளம்பரங்கள் மற்றும் நவீன யுக்திகளுடன் ‘கிளவுட் கிச்சன்’ போன்ற புதிய பரிணாமத்தைப் பெற்றுள்ளன.
கிளவுட் கிச்சன் ஏன் பெண்களின் தேர்வாக மாறியது..?
பொறுமை, காத்திருப்பு மற்றும் சரியான உத்தி ஆகிய 3 அத்தியாவசிய வணிகப் பண்புகளைப் பெண்கள் எளிதில் கற்றுக்கொள்வதால், ஆண்களை விட குறுகிய காலத்தில் தொழிலில் உச்சத்தை அடைகின்றனர். நஷ்டத்தை சந்திக்கும் போதும், மனம் தளராமல் மீண்டும் முயற்சிக்கும் போராடும் குணம் பெண்களுக்கு அதிகம். இதற்கு சிறந்த எடுத்துக்காட்டாக ‘காபி டே’ சாம்ராஜ்ஜியத்தை மீட்டெடுத்த மாளவிகா ஹெக்டே போன்ற பல பெண் தொழிலதிபர்களை குறிப்பிடலாம்.
இந்த வரிசையில், கடந்த 2 ஆண்டுகளில் அதிகப்படியான பெண்கள் முன்னெடுக்கும் தொழிலாக ‘கிளவுட் கிச்சன்’ மாறியுள்ளது. குறிப்பாக, கொரோனா பெருந்தொற்றுக்கு பிறகு, இத்தொழில் சூடு பிடித்துள்ளது. அதிக முதலீடு தேவையில்லை, நிறைய பொருட்கள் வாங்க வேண்டியதில்லை. வெளிநாடுகளில் பிரபலமாக இருந்த இந்த மாதிரி, தற்போது சென்னை, பெங்களூரு போன்ற பெருநகரங்களில் வேகமாகப் பரவி வருகிறது. இது ஹோட்டல் தொழிலை விட மிகவும் பாதுகாப்பானதாக கருதப்படுகிறது.
கிளவுட் கிச்சன் என்றால் என்ன..?
வீட்டு உணவை அதிகம் விரும்பும் வெளியூர்களில் இருந்து வந்து தங்கும் பேச்சுலர்கள், பிஜி-யில் தங்கி வேலை செய்பவர்கள் அல்லது மாணவர்கள் போன்றோரை இலக்காக கொண்டு தொடங்கப்படுவதே கிளவுட் கிச்சன். இதில் அதிக மசாலாக்கள் சேர்க்காமல், வீட்டில் சமைப்பது போன்ற சுவையுடனும், ஹோட்டல் விலையை விட குறைந்த விலையிலும் உணவை தயாரித்து விற்பனை செய்யலாம்.
இதற்காக, நீங்கள் ஸ்விக்கி, சொமேட்டோ போன்ற உணவு டெலிவரி செயலிகளுடன் ஒப்பந்தம் செய்ய வேண்டும். வாடிக்கையாளர்கள் ஆர்டர் கொடுத்தவுடன், டெலிவரி ஊழியர்கள் உங்கள் வீட்டிற்கு வந்து உணவைப் பெற்றுக் கொண்டு, ஆர்டர் செய்தவர்களுக்கு கொண்டு சென்று வழங்குவார்கள். மொத்த ஆர்டரில் ஒரு குறிப்பிட்ட தொகையை நீங்கள் கமிஷனாக உணவு டெலிவரி செயலிக்கு வழங்க வேண்டும். மீதமுள்ள பணம் உங்களுக்கு லாபமாக வந்து சேரும்.
தொழிலை ஆரம்பிப்பதற்கான வழிகள் :
கிளவுட் கிச்சனை தொடங்க 50 முதல் 300 சதுர அடி இடம் போதுமானது. உங்கள் வீட்டு மாடியில் ஒரு சிறிய சமையலறை போன்ற செட்டப் செய்துகொள்ளலாம் அல்லது உங்கள் வீட்டு சமையலறையே போதுமானதுதான்.
நீங்கள் செய்ய வேண்டியவை :
பிராண்டிங்: உங்கள் கிச்சனுக்கு ஒரு நல்ல பெயர் மற்றும் லோகோவை தயாரித்து, சமூக ஊடகங்களில் விளம்பரம் செய்ய தொடங்கவும்.
மெனு: காலை, மதியம், இரவு நேர உணவுகளை பட்டியலிட வேண்டும்.
டெலிவரி ஒப்பந்தம்: உணவு டெலிவரி செயலிகளுடன் ஒப்பந்தம் செய்யலாம்.
பேக்கிங் கவனம்: சமைத்த உணவை முறையாக பேக் செய்வது மிகவும் அவசியம். வாடிக்கையாளர்கள் குறை சொல்வது பெரும்பாலும் பேக்கிங் சரியில்லை என்பதால்தான். உணவுகள் ஒன்றோடொன்று கலக்காமல் இருக்க, பேக்கிங்கில் அதிக கவனம் செலுத்த வேண்டும்.
வாடிக்கையாளர்களை பெருக்கும் உத்திகள் :
உணவு டெலிவரி செயலிகளை தவிர்த்து, நீங்கள் நேரடியாக அருகில் உள்ள அலுவலகங்கள், சிறிய நிறுவனங்கள் அல்லது தொழிற்சாலைகளை அணுகி ஆர்டர்களை எடுக்கலாம். அவர்களுக்கு காலை அல்லது மதிய உணவை சரியான நேரத்தில் டெலிவரி செய்யலாம். குறைந்த வாடிக்கையாளர்களை வைத்து நீண்ட நாட்களுக்குத் தொழிலை நடத்த முடியாது.
எனவே, ஆஃபர்களை அறிவிப்பது, ‘வாராந்திர பேக்’ அல்லது ‘மாதாந்திர பேக்’ போன்ற திட்டங்களைச் சேர்ப்பது போன்ற உத்திகள் மூலம் வாடிக்கையாளர்களை அதிகரிக்க வேண்டும். பிறந்த நாள் விழாக்கள் அல்லது அலுவலகச் சிறப்பு நாட்களுக்கான மொத்த ஆர்டர்களைப் பெறுவதன் மூலமும் உங்கள் வணிகத்தை நீட்டித்து லாபத்தைப் பெருக்கலாம்.
உங்கள் சொந்த வீட்டு சமையலறையில் தொடங்கினால், பாத்திரங்கள் மற்றும் சமையல் பொருட்களுக்கான முதலீடாக ரூ.30,000 போதுமானது. தனியாக இடம் எடுத்து செட்டப் செய்தால், ரூ.50,000 வரை முதலீடு தேவைப்படலாம். குறைவான முதலீடு மற்றும் அதிக லாபம் காரணமாகவே, சென்னை, பெங்களூரு போன்ற மாநகரங்களில் ஹோட்டல் செஃப்கள் கூட இப்போது கிளவுட் கிச்சனில் அதிக கவனம் செலுத்த ஆரம்பித்துள்ளனர்.
Read More : ரயில் நிலையங்களில் மட்டும் ஏன் மெடிக்கல் ஷாப் இல்லை தெரியுமா..? மத்திய அரசின் அடுத்த பிளான் இதுதான்..!!
