இன்றைய அவசரமான மற்றும் தொழில்நுட்பம் சார்ந்த வாழ்க்கை முறை காரணமாக, பெரும்பாலானோர் உடலுக்கான இயக்கத்தை முற்றிலுமாக குறைத்துவிட்டனர். இதனால் உடல் பருமன், இதய நோய்கள், நீரிழிவு போன்ற உடல்நலப் பிரச்சனைகள் அதிகரித்து வருகின்றன. ஆனால், உங்கள் வேலை எவ்வளவு பரபரப்பாக இருந்தாலும், தினமும் குறைந்தது 15 நிமிடங்கள் நடைப்பயிற்சி செய்வது அவசியம் என்று உடல்நலன் நிபுணர்கள் வலியுறுத்துகின்றனர். குறிப்பாக, 30 வயதை கடந்த பெண்களுக்கு இந்த சிறிய நடைப்பயிற்சி இரட்டிப்பு நன்மைகளை அளிப்பதாக ஆய்வுகள் கூறுகின்றன.
செரிமானமும் ரத்த ஓட்டமும் சீராகும் :
உணவு உண்ட பிறகு சிறிது நேரம் நடப்பது செரிமான அமைப்புக்கு மிகவும் நல்லது. நடைப்பயிற்சியின் போது வயிறு மற்றும் குடலின் இயக்கம் சீராகி, உணவு செரிமானம் ஆவது எளிதாகிறது. இதனால் வயிறு வீக்கம், அசெளகரியம் போன்ற பிரச்சனைகள் குறைகின்றன. மேலும், இது குடல் ஆரோக்கியத்தை மேம்படுத்தும் நல்ல பாக்டீரியாக்களின் வளர்ச்சியைத் தூண்டி, உடலின் ஊட்டச்சத்து உறிஞ்சும் திறனை அதிகரிக்கிறது. தொடர்ச்சியாகச் செய்யப்படும் இந்தச் செயல்பாடு, செரிமான அமைப்பை திறமையாகவும் ஆரோக்கியமாகவும் மாற்றுகிறது.
நடைப்பயிற்சியின் போது இதயத் துடிப்பு சற்றே அதிகரிப்பதால், ஆக்சிஜன் நிறைந்த இரத்த ஓட்டம் மூளைக்கு சீராக செல்கிறது. இது கவனம், நினைவாற்றல் மற்றும் முடிவெடுக்கும் திறனை மேம்படுத்த உதவுகிறது. தினமும் 15 நிமிடங்கள் நடப்பது மூளையில் உள்ள நரம்புச் செயல்பாடுகளைச் சீராக்கி, மன அழுத்தத்தைக் குறைக்கிறது என்றும், இது நினைவாற்றல் குறைவு போன்ற மனநலப் பிரச்சனைகளைத் தடுக்க உதவும் என்றும் நிபுணர்கள் கூறுகின்றனர்.
சர்க்கரை கட்டுப்பாடு மற்றும் மூட்டுகள் உறுதி :
உணவுக்குப் பிறகு 15 நிமிட நடைப்பயிற்சி செய்வது, ரத்த சர்க்கரை அளவை சமநிலைப்படுத்துவதில் முக்கியப் பங்காற்றுகிறது. நடக்கும்போது உடல் தசைகள் குளுக்கோஸை உடனடியாக உறிஞ்சத் தொடங்குவதால், ரத்த சர்க்கரை திடீரென உயர்வது தடுக்கப்படுகிறது. இது நீண்டகாலத்தில் இன்சுலின் எதிர்ப்பு உருவாகும் அபாயத்தைக் குறைத்து, நீரிழிவு நோயைத் தடுப்பதற்கான வாய்ப்பை அதிகரிக்கிறது. மேலும், நடைப்பயிற்சி வளர்சிதை மாற்றத்தைச் சமநிலைப்படுத்தி, நாள் முழுவதும் புத்துணர்ச்சியுடன் செயல்பட உதவுகிறது.
தொடர்ச்சியான நடைப்பயிற்சி, மூட்டுகளுக்கு ஒரு இயற்கையான உடற்பயிற்சியாகும். இது எலும்புகள் மற்றும் தசைகளுக்கு இடையிலான பிணைப்பை வலுப்படுத்துகிறது. குறிப்பாகக் கால் மூட்டுகள் தொடர்ந்து இயக்கமடைவதால், வயதான காலத்திலும் அவற்றின் நெகிழ்வுத்தன்மை நீடிக்கிறது. தினமும் 15 முதல் 30 நிமிடங்கள் நடப்பது, மூட்டு வலியான ஆஸ்டியோஆர்த்ரைடிஸ் போன்ற நோய்கள் வருவதற்கான அபாயத்தை குறைப்பதாக ஆய்வுகள் தெரிவிக்கின்றன.
சருமப் பொலிவும் மன அமைதியும் :
நடைப்பயிற்சியின் மூலம் உடலின் ரத்த ஓட்டம் அதிகரிப்பதால், சரும செல்களுக்குப் போதுமான ஆக்ஸிஜன் மற்றும் ஊட்டச்சத்துக்கள் கிடைத்து, சருமம் தெளிவாகவும் ஆரோக்கியமாகவும் மாறுகிறது. வியர்வை மூலமாக உடலிலிருந்து நச்சுப் பொருட்கள் வெளியேறுவதும், கொலாஜன் உற்பத்தி ஊக்குவிக்கப்படுவதும் முகத்திற்கு இயற்கையான பொலிவையும் இளமைத் தோற்றத்தையும் அளிக்கின்றன.
நடைப்பயிற்சி என்பது மன அழுத்தத்தை குறைப்பதற்கான எளிய வழியாகும். இது உடலில் ‘மகிழ்ச்சியான ஹார்மோன்கள்’ என்று அழைக்கப்படும் செரோடோனின் மற்றும் எண்டார்பின் போன்றவற்றை அதிகரிக்க செய்கிறது. இதனால் நரம்பு மண்டலம் அமைதியாகி, மனநிலை மேம்படுவதுடன், தூக்கத்தின் தரமும் அதிகரித்துப் புத்துணர்ச்சி கிடைக்கிறது.
Read More : தங்க நகைகள் சேமிப்பில் அமெரிக்காவையே மிஞ்சும் தமிழ்நாட்டு பெண்கள்..!! மொத்தம் எத்தனை டன்கள் தெரியுமா..?
