ஒவ்வொரு நாளும் உயர்ந்து வரும் தங்கம் விலை, ஏழை எளிய மக்களையும், பெண் பிள்ளைகளைப் பெற்றவர்களையும் அதிர்ச்சியில் ஆழ்த்தியுள்ளது. கடந்த 10 மாதங்களில் மட்டும் ஒரு சவரன் தங்கம் சுமார் ரூ.40,000 வரை அதிகரித்து, வரலாறு காணாத புதிய உச்சத்தைத் தொட்டுள்ளது. கடந்த ஆண்டு டிசம்பரில் ரூ.56,880-ஆக இருந்த ஒரு சவரன் தங்கம், சமீபத்தில் ரூ.97,600-ஐ தொட்டது. இந்த விலை உயர்வு சாமானியர்களுக்குத் தங்கம் வாங்குவது இனி கனவாகத்தான் இருக்கும் என்ற அபிப்ராயத்தை உருவாக்கியுள்ளது.
ஆனால், தங்கம் விலை எவ்வளவு உயர்ந்தாலும், தமிழ்நாட்டு மக்களிடம் தங்க நகைகள் வாங்கும் பழக்கம் குறையவில்லை என்று நகை வியாபாரிகள் தெரிவித்துள்ளனர். விலை குறையலாம் என்று சிலர் காத்திருந்தாலும், ‘இன்னும் விலை கூடிவிடக் கூடாது’ என்று நினைத்து உடனே வாங்கிவிடுவதால் விற்பனை குறையவில்லை என்று வியாபாரிகள் கூறுகின்றனர்.
தமிழ்நாட்டின் தங்க சேமிப்பு உலக சாதனை :
இந்தியா மட்டுமின்றி உலகையே வியக்க வைக்கும் ஒரு தகவலை நகை வியாபாரிகள் வெளியிட்டுள்ளனர். உலக தங்க கவுன்சிலின் கணக்கீட்டின்படி, தமிழ்நாட்டுப் பெண்களிடம் மட்டும் சுமார் 6,720 டன் தங்கம் கையிருப்பில் உள்ளது. இது எவ்வளவு பெரிய அளவு என்றால், அமெரிக்கா போன்ற வளர்ந்த நாடுகளில் கையிருப்பில் இருக்கும் தங்கத்தின் அளவுக்கு (அமெரிக்கா – 8,133.46 டன்) கிட்டத்தட்ட சமமாகும். மேலும், ஜெர்மனி, இத்தாலி, ரஷ்யா போன்ற நாடுகளில் உள்ள கையிருப்பை விட, தமிழ்நாட்டு மக்களிடம் உள்ள தங்கத்தின் அளவு அதிகமாகும்.
தங்கம் என்பது தமிழர்களின் பாரம்பரியம் என்றும், அதை வெறும் வருமானமாக அல்லாமல் செல்வமாக கருதிச் சேமிக்கிறார்கள் என்றும் நகை வியாபாரிகள் சங்க தலைவர் ஜெயந்திலால் சலானி தெரிவித்துள்ளார். தங்கம் ஒரு குடும்பத்திற்கு கவுரவம், பொருளாதாரப் பாதுகாப்பு மற்றும் அவசர கால நிதி உதவியை அளிக்கிறது. அதனால் தான், விலை உயர்ந்தாலும் மக்கள் தொடர்ந்து தங்கம் வாங்குவதில் ஆர்வம் காட்டுகிறார்கள்.
வரலாற்று ரீதியாக, 1968-ல் மத்திய அரசு தங்கக் கட்டுப்பாட்டுச் சட்டத்தைக் கொண்டு வந்தபோது, தங்க நாணயங்கள் மற்றும் கட்டிகள் வைத்திருப்பது சட்டவிரோதமானது என்று அறிவிக்கப்பட்டது. அப்போது, மக்கள் தங்கள் தங்கத்தை கட்டி நகைகளாக மாற்றத் தொடங்கினர். அதுவே, இன்று சேமிக்கும் பழக்கமாக மாறிவிட்டது.
2028-க்குள் 150% விலை உயர்வு..?
தங்கம் மற்றும் வைர வியாபாரிகள் சங்க தலைவர் ஜெயந்திலால் சலானி மேலும் கூறுகையில், “கடந்த 20 ஆண்டுகளாக ஆண்டுதோறும் 8 முதல் 10 சதவீதம் விலை அதிகரித்து வருகிறது. இதே நிலை தொடர்ந்தால், வரும் 2028 ஆம் ஆண்டுக்குள் தங்கம் விலை 150 சதவீதம் வரை அதிகரிக்க வாய்ப்பு உள்ளது” என்று அதிர்ச்சி தகவலை வெளியிட்டுள்ளார்.
Read More : “விஜயகாந்த் செய்த தவறை நான் எப்போதும் செய்ய மாட்டேன்”..!! சீமான் பரபரப்பு பேட்டி..!!
