நாம் தமிழர் கட்சியின் தலைமை ஒருங்கிணைப்பாளர் சீமான், எதிர்வரும் தேர்தல்களில் கட்சியின் நிலைப்பாடு மற்றும் எதிர்கால உத்திகள் குறித்து சென்னையில் செய்தியாளர்களை சந்தித்துப் பேசினார். அப்போது, தமிழக அரசியல் களத்தில் தாங்கள் தனித்து நின்று மாற்றத்தைக் கொண்டு வருவதில் உறுதியாக இருப்பதாக தெரிவித்தார்.
கூட்டணிக்காக காத்திருக்காமல், தமிழகத்தில் உள்ள 234 சட்டமன்றத் தொகுதிகளிலும் தங்கள் கட்சி தனித்தே போட்டியிடப் போவதாக சீமான் அறிவித்தார். தமிழக அரசியல் களத்தை மாற்றியமைக்கத் தேவையான நடவடிக்கைகளை எடுத்து வருகிறோம். ஒரு நல்ல அரசியல் சூழல் உருவாக வேண்டும் என்ற எண்ணத்தோடு செயல்படுவோம் என்றும் அவர் கூறியிருக்கிறார்.
மேலும், வாக்குக்குப் பணம் கொடுக்கும் கட்சிகளுக்கு மத்தியில், எந்த எதிர்பார்ப்பும் இல்லாமல் இதுவரை 35 லட்சம் பேர் தனக்கு வாக்களித்துள்ளதாகவும், இந்த எண்ணிக்கை விரைவில் 60 லட்சத்தை தாண்டி ஒரு கோடியை எட்டும் என்றும் தெரிவித்தார். “மாற்றத்தை உடனடியாக ஏற்படுத்த முடியாது. இது, நான் மக்களுக்குக் கொடுத்து வரும் கசாயம் போன்றது. மெதுவாகத்தான் வேலை செய்யும். அவசரம் காட்டக் கூடாது” என்றும் அவர் குறிப்பிட்டார்.
கூட்டணி விஷயத்தில் விஜயகாந்த் செய்த தவறை தான் ஒருபோதும் செய்யப் போவதில்லை என்று கூறிய சீமான், “அரசியல் கட்சிகளுக்கு மாற்றாக வந்தவர், பிறகு அதே கட்சிகளோடு கூட்டணி வைத்தால் எப்படி மாற்றத்தை கொண்டு வர முடியும்? தனித்து நின்று 10 சதவீத வாக்குகளைப் பெற்ற விஜயகாந்த், கூட்டணி அமைத்த பிறகு வாக்குச் சதவீதம் குறைந்தது ஏன் என்பது அனைவருக்கும் தெரியும். எனவே, எந்தத் தேர்தலிலும், யாருடனும், எப்போதும் கூட்டணி கிடையாது. தனித்து நின்று நாம் தமிழர் கட்சி நிச்சயம் பலம்பெறும், விரைவில் ஆட்சியில் அமரும் என்ற நம்பிக்கை உள்ளது” என்று கூறினார்.
