தமிழ்நாட்டில் 2026 ஆம் ஆண்டிற்கான அரசு பொது விடுமுறை நாட்கள் குறித்த அதிகாரப்பூர்வ அறிவிப்பை அரசு வெளியிட்டுள்ளது. தமிழக அரசின் உள்துறைச் செயலாளர் (முதன்மைச் செயலர்) என். முருகானந்தம் கையெழுத்திட்ட இந்த உத்தரவில், ஞாயிற்றுக்கிழமைகளைத் தவிர்த்து மற்ற விடுமுறை நாட்களின் விவரங்கள் தெளிவாக குறிப்பிடப்பட்டுள்ளன.
இந்தப் பொது விடுமுறை நாட்களில் அனைத்து அரசுத் துறைகள், அலுவலகங்கள் மற்றும் கல்வி நிறுவனங்கள் அனைத்தும் இயங்காது. வங்கிகளுக்கு அவற்றின் வருடாந்திர கணக்கு முடிவு நாள் போன்ற துறைய ரீதியான விடுமுறைகள் தனிப்பட்ட முறையில் அளிக்கப்படலாம் என்றும் அரசு அறிவிப்பில் தெரிவிக்கப்பட்டுள்ளது.
அரசு அறிவித்துள்ள விடுமுறைப் பட்டியலின்படி, 2026 ஆம் ஆண்டு ஜனவரி 1 ஆம் தேதி புத்தாண்டு தினம் வியாழக்கிழமை வருகிறது. இதைத் தொடர்ந்து, பொங்கல் (ஜனவரி 15), திருவள்ளுவர் தினம் (ஜனவரி 16) மற்றும் உழவர் திருநாள் (ஜனவரி 17) ஆகியவை வியாழன் முதல் சனிக்கிழமை வரை அமைந்து, அரசு ஊழியர்கள் மற்றும் மாணவர்களுக்கு ஆண்டின் தொடக்கத்திலேயே ஒரு நீண்ட விடுமுறையை உறுதிசெய்கின்றன. இதைத் தொடர்ந்து, குடியரசு தினம் ஜனவரி 26-ஆம் தேதி திங்கட்கிழமை வருகிறது.
முக்கியப் பண்டிகைகளும் தொடர் விடுமுறைகளும் :
ஆண்டு முழுவதும் வரும் முக்கியப் பண்டிகைகளுக்கான விடுமுறைகளும் பட்டியலில் இடம்பெற்றுள்ளன. ரம்ஜான் (மார்ச் 21) சனிக்கிழமையிலும், சுதந்திர தினம் (ஆகஸ்ட் 15) சனிக்கிழமையிலும் வருகிறது. இந்த இரு நாட்களும் வார விடுமுறையுடன் இணைந்துள்ளன. மேலும், புனித வெள்ளி (ஏப்ரல் 3) மற்றும் மே தினம் (மே 1) இரண்டும் வெள்ளிக்கிழமைகளில் வருகின்றன. கிருஷ்ண ஜெயந்தி (செப்டம்பர் 4), விநாயகர் சதுர்த்தி (செப்டம்பர் 14), காந்தி ஜெயந்தி (அக்டோபர் 2) ஆகியவை முறையே வெள்ளி, திங்கள், வெள்ளி கிழமைகளில் அமைந்துள்ளன.
ஆயுத பூஜை மற்றும் கிறிஸ்துமஸ் :
ஆயுத பூஜை அக்டோபர் 19 (திங்கள்), அதைத் தொடர்ந்து விஜயதசமி அக்டோபர் 20 (செவ்வாய்) என இரண்டு நாட்கள் தொடர்ந்து விடுமுறை அறிவிக்கப்பட்டுள்ளது. தீபாவளி நவம்பர் 8-ஆம் தேதி ஞாயிற்றுக்கிழமை வருவதால், கூடுதல் விடுமுறை இல்லை. ஆண்டின் இறுதியில், கிறிஸ்துமஸ் பண்டிகை டிசம்பர் 25-ஆம் தேதி வெள்ளிக்கிழமை வருவதால், வார இறுதி நாட்களுடன் இணைத்துப் பலருக்கு நீண்ட விடுமுறை கிடைக்கும் வாய்ப்பு உள்ளது.
Read More : பள்ளி மாணவர்களுக்கு 12 நாட்கள் தொடர் விடுமுறை..!! தேதியை அறிவித்த பள்ளிக்கல்வித்துறை..!!
