நாடு முழுவதும் உள்ள மத்திய அரசின் கட்டுப்பாட்டில் இயங்கும் கேந்திரிய வித்யாலயா (KVS) மற்றும் நவோதயா வித்யாலயா சமிதி (NVS) ஆகிய பள்ளிகளில் காலியாக உள்ள ஆசிரியர் மற்றும் ஆசிரியர் அல்லாத சுமார் 14,967 பணியிடங்களை நிரப்புவதற்கான அறிவிப்பை மத்திய இடைநிலை கல்வி வாரியம் (CBSE) மற்றும் கேந்திரிய வித்யாலயா சங்கதன் ஆகியவை வெளியிட்டுள்ளன. இந்தப் பணியிடங்களுக்கு விண்ணப்பிக்க டிசம்பர் 4-ஆம் தேதி கடைசி நாள் என நிர்ணயிக்கப்பட்டுள்ளது.
மொத்தப் பணியிடங்கள்: 14,967
பிரிவு வாரியாக: கேந்திரிய வித்யாலயா பள்ளிகளில் 9,126 பணியிடங்களும், நவோதயா பள்ளிகளில் 5,841 பணியிடங்களும் காலியாக உள்ளன.
ஆசிரியர் பிரிவில் (13,008 இடங்கள்): இதில் அதிகபட்சமாக இடைநிலை ஆசிரியர்கள், பட்டதாரி ஆசிரியர்கள், முதுநிலை ஆசிரியர்கள், அத்துடன் முதல்வர், துணை முதல்வர் மற்றும் நூலகர் பதவிகளும் அடங்கும்.
ஆசிரியர் அல்லாத பிரிவில் (1,959 இடங்கள்): இந்த தொகுப்பில் உதவி ஆணையர், நிர்வாக அதிகாரி, இளநிலை உதவியாளர், மூத்த உதவியாளர், உதவி பிரிவு அலுவலர் (ASO), நிதி அதிகாரி, பொறியாளர், மொழிபெயர்ப்பாளர் மற்றும் சுருக்கெழுத்தாளர் (Stenographer) போன்ற நிர்வாகப் பணியிடங்கள் உள்ளன.
விண்ணப்ப நடைமுறை மற்றும் தேர்வு :
இந்தப் பணியிடங்களில் சேர விரும்பும் தகுதியுடைய நபர்கள், kvsangathan.nic.in மற்றும் cbse.nic.in ஆகிய அதிகாரப்பூர்வ இணையதளங்கள் மூலமாக டிசம்பர் 4-ஆம் தேதிக்குள் விண்ணப்பிக்க வேண்டும்.
எழுத்துத் தேர்வு: விண்ணப்பித்தவர்களுக்கான எழுத்துத் தேர்வு கணினி வழியில், ஜனவரி மற்றும் பிப்ரவரி மாதங்களில் நடத்தப்பட உள்ளது.
அனுமதிச் சீட்டு: தேர்வுக்கான அனுமதிச் சீட்டு (Hall Ticket) டிசம்பர் மாதத்திலேயே வெளியிடப்படும் என்று எதிர்பார்க்கப்படுகிறது.
மத்திய அரசு ஊழியர்களின் குழந்தைகள் அதிகம் படிக்கக்கூடிய தன்னாட்சி அதிகாரத்துடன் செயல்படும் இந்தப் பள்ளிகளில், பல மாநிலங்களில் போதுமான எண்ணிக்கையில் பள்ளிகள் இல்லை என்றும், அதிக காலிப் பணியிடங்கள் இருப்பதாகவும் நீண்ட நாட்களாக கூறப்பட்டு வந்தது. இந்தச் சிக்கலைத் தீர்க்கும் வகையில், மத்திய அரசு இந்த ஆண்டு புதிதாக 57 கேந்திரிய வித்யாலயா பள்ளிகளை அமைக்க ஒப்புதல் அளித்தது. அதன் தொடர்ச்சியாக, இந்தக் காலிப் பணியிடங்களை நிரப்புவதற்கான அறிவிப்பு தற்போது வெளியாகி உள்ளது குறிப்பிடத்தக்கது.
