இந்தியாவின் அடையாள ஆவணமாகத் திகழும் ஆதார் அட்டையின் பாதுகாப்பு மற்றும் தரவு கசிவுகளை தடுக்கும் நோக்கில், ஆதார் அடையாள அட்டை ஆணையமான UIDAI (Unique Identification Authority of India) ஒரு முக்கியமான மாற்றத்தை டிசம்பர் மாதம் முதல் அமல்படுத்த உள்ளது. இந்த மாற்றம் நடைமுறைக்கு வரும்போது, இனிமேல் ஆதார் அட்டையில் இருக்கும் 12 இலக்க எண் அச்சிடப்படாது என்று அறிவிக்கப்பட்டுள்ளது.
தற்போது நாம் பயன்படுத்தும் ஆதார் நகல்களை, ஹோட்டல்கள் அல்லது சிம் கார்டு பதிவு போன்ற பல இடங்களில் ஆவணமாக வழங்கும் போது, தனிநபர்களின் முக்கிய விவரங்கள் கசிந்து, அது ஆன்லைன் மோசடிகளுக்கு வழிவகுக்கும் அபாயம் இருப்பதாக UIDAI கருதுகிறது.
இந்த அபாயத்தை தவிர்க்கும் வகையில், டிசம்பர் மாதம் முதல் வெளிவரும் புதிய ஆதார் அட்டைகளில் 12 இலக்க ஆதார் எண் நீக்கப்பட்டு, அதற்குப் பதிலாக அட்டைதாரரின் புகைப்படம் மற்றும் QR கோடு மட்டுமே இடம்பெறும்.
புதிய அட்டையில், அட்டைதாரரின் பெயர் மட்டும் இடம்பெற வாய்ப்புள்ளது. முகவரி போன்ற மற்ற விவரங்கள் அச்சிடப்படாது என்றும் தகவல்கள் தெரிவிக்கின்றன. இந்த மாற்றத்தின் முதல் கட்டமாக, தற்போதுள்ள mAadhaar மொபைல் செயலிக்குப் பதிலாக, புதிய ஆதார் மொபைல் செயலி அறிமுகப்படுத்தப்பட உள்ளது.
இந்த புதிய செயலி மூலம் ஆதார் விவரங்களை டிஜிட்டல் முறையில், பாதுகாப்பாக காட்ட முடியும். இதன் காரணமாக, எதிர்காலத்தில் மக்கள் காகித நகலையோ அல்லது ஜெராக்ஸ் பிரதியையோ ஆவணமாகக் கொடுக்க வேண்டிய அவசியம் இருக்காது.
புதிய ஆதார் அட்டையில் உள்ள QR கோடின் செயல்பாட்டில் கூடுதல் பாதுகாப்பு அம்சங்கள் சேர்க்கப்பட்டுள்ளன. இந்த QR கோடை அரசாங்கத்தால் அங்கீகரிக்கப்பட்ட பிரத்யேகக் கருவி அல்லது செயலி மூலம் மட்டுமே ஸ்கேன் செய்து ஆதார் விவரங்களைப் பார்க்க முடியும். சாதாரண மொபைல் சாதனங்கள் அல்லது செயலிகள் மூலம் இந்தக் குறியீட்டை அணுக முடியாது.
இந்த மாற்றம் நடைமுறைக்கு வரும்போது, ஆதார் விவரங்களை தவறாக பயன்படுத்துவது மற்றும் ஆன்லைன் மோசடிகளில் ஈடுபடுவது போன்ற செயல்களைப் பெருமளவில் தடுக்க முடியும் என்று எதிர்பார்க்கப்படுகிறது. ஆதார் விவரங்களை தவறாகப் பயன்படுத்தும் செயல்களை தடுக்க புதிய விதிகள் அறிமுகப்படுத்தப்பட உள்ளதாகவும், எதிர்காலத்தில் ஆதார் அடையாளம் முழுவதும் டிஜிட்டல் பாதுகாப்பில் இருக்கும் என்றும் UIDAI அதிகாரிகள் தெரிவித்துள்ளனர். இந்த மாற்றங்கள் டிசம்பர் மாதத்தில் இருந்து அமல்படுத்தப்பட உள்ளது. அதிகாரப்பூர்வ தேதிகள் விரைவில் அறிவிக்கப்படும்.
Read More : தோட்டத்து வீட்டில் பயங்கரம்..!! தனியாக இருந்த தம்பதியை கட்டிப்போட்டு 18 சவரன் நகைகள் கொள்ளை..!!
